Tu baantail mayaa kaajo’ob tu péetlu’umil Quintana Roo, leti’e’ tu’ux ts’o’ok u yila’al yaan u jach talamil ichil máaxo’ob ku tsa’ayal u ts’unusil iim, beey úuchik u ya’alal tumen Frida Angélica Venegas Fabián, máax jo’olbesik u múuch’kabil Un Grano de Arena por Mujer, tu’ux ku yáanta’al ko’olel ti’al u séeb ilik yéetel u ts’aatáantik le k’oja’anila’.
“To’one’ táan k-ilike’, kéen xi’iko’on te’e baantao’, ya’abach ko’olele’ ts’o’ok u k’uchul tu jach talamil le k’oja’anilo’, le beetik jach talam u béeytal k-áantiko’ob ti’al u líik’ilo’ob; to’one’ kbin kxíimbalto’ob, ktsikbal yéetelo’ob, ts’o’oke’ kéen k-il wa yaan máax k’oja’ane’ kmáansik yiknal u mola’ayilo’ob toj óolal”, tu tsolaj.
En español: Los casos más severos de cáncer de mama en QRoo se han detectado en la zona maya
Leti’e’ meyaj ku taal u beetiko’ob te’e kaajo’obo’. Ku much’a’al kex 30 ko’olel ti’al u biinsa’alo’ob ti’ noj kaaj, ti’al u beeta’al ultrasonidóos yéetel máastografías xma’ bo’olil. “Ts’o’ok kmeyaj ti’ jejeláas kaajo’ob, ba’ale’ ma’ béeychaj u láaj p’áatalo’ob tak éeteli’, tumen yaane’ jach ts’o’ok u lúubsa’alo’ob tumen ts’unusi’”, tu ya’alaj.
Tsikbal yéetel Venegas Fabián beeta’ab ka’aj ts’o’ok u tse’ek yóok’lal bix je’el u beetik máak ti’al u séeb ilik wa tsaayal u ts’unusil iim, tu kaajil Tulum, tumen bejla’a 19 ti’ octubre táan u máan Día Internacional de la Lucha contra el Cáncer de Mama.
Ti’ tse’eke’ Ariadne Rincóne’ tu k’a’ajsaj u k’a’ananil u séeb na’ata’al wa tu tsa’ayal k’oja’anil, tumen wa ka beeta’ake’ je’el u yutstal tak 98% máax ti’ ku tsa’ayal. Ku ya’alale’, ma’alob ka káajs u xak’altik u yiim ko’olel kéen u chuk 20 u ja’abil. Unaj u beeta’al ukp’éel k’iino’ob ma’ili’ yéetel ts’o’okili’ u yéemel u k’oja’anil ko’olel.
Máax jo’olbesik u múuch’kabil Un Grano de Arena por Mujer tu ya’alaje’, ku beetik jejeláas ba’alo’ob ti’al u kaxtik u taak’inil u meyaj. Ko’olel bíin u yóot okol ti’al u k’amik u yutsil le múuch’ila’, ku béeytal u kaxtik u Facebookil yéetel u Instagramil Un Grano de Arena por Mujer wa u t’aan tu numeroil 9841355878.
Xak'alutskíinsa'an tumen: Sasil Sánchez Chan
