Máaxo’ob kaláantik wa líik’sik paalal ts’o’ok u chukik u ja’abil u xook ti’al u yokolo’ob tu ka’a wa tu yóox ja’abil xook preeskolar, u yáax ja’abil primaryáa wa u yáax ja’abil séekundaryae’ yaan u béeytal u yáax ts’íibtik u k’aaba’ob ti’ Internet, tu kúuchil preinscripciones.segey.gob.mx/.
U mola’ayil Secretaría de Educación del Gobierno del Estado de Yucatán (Segey), dio tu k’a’aytaj u páayt’aanil u nu’ukbesajil Cupo para todos, beeta’an jach chéen u ti’al máaxo’ob ku xooko’ob ti’ puublikáa najilo’ob xook.
U ts’íibta’al u k’aaba’obe’ ku p’áatal beya’: ti’al preeskolare’, unaj u beeta’al ichil 21 tak 30 ti’ noviembre, ti’al u yáax ja’abil xook primaryae’ 29 ti’ noviembre tak 8 ti’ diciembre, yéetel ti’al u yáax ja’abil sekundaryae’ 6 tak 16 ti’ diciembre.
En español: ‘Cupo para Todos’: Comienzan preinscripciones en línea para educación básica
Ti’al máax bíin u yóot u beetej ba’ale’ mina’an ti’ internete’, yaan u ts’a’abal áantaj tu kúuchilo’ob Centros de Desarrollo Educativo (Cede) ti’ u méek’tankaajilo’ob Hunucmá, Izamal, Maxcanú, Motul, Peto, Tekax, Ticul, Tizimín, Saki’ yéetel Yaxcabá, je’el bix xan tu ka’ap’éel kúuchil yaan tu kaajil Jo’.
Ti’al kaajo’ob tu’ux yaan chéen jump’éel najil xooke’, yaan u yantal u bin máak te’e kúuchilo’, ichil u k’iinil 3 tak 21 ti’ noviembre ti’al u jets’iko’ob jach ti’ u k’áato’ob ka yáax ts’íibta’ak u k’aaba’ le paalo’.
Segeye’ ku ya’alike’ ma’alob ka tukulta’ak tak kamp’éel najilo’ob xook, tumen yaan k’iine’ jach chochobkil u k’áata’al u yoksa’al wa máax te’e kúuchilo’obo’, le beetik ku yantal u biinsa’alo’ob uláak’ táanxel tu’ux.
Ichil 30 tak 31 ti’ enero ti’ u ja’abil 2024 kéen ts’a’abak k’ajóoltbil tu’ux najil xook kun yokol u xookil paalal preeskolar yéetel primarya, ka’alikil ti’al sekundaryae’ yaan u jóok’sa’al tak 10 ti’ junio.
Beey túuno’, kéen ts’o’okok u ts’a’abal k’ajóoltbil tu’ux p’áato’obe’, k’a’abéet u bin máak te’e najil xooko’ ti’al u jets’ik jach ti’ kun p’áata’ali’.
Xak'alutskíinsa'an tumen: Sasil Sánchez Chan
