Tu k’iinilo’ob 9 tak 10 ti’ noviembree’, yaan u beeta’al tu súutukil 8 tak 2 u taal u chíinil k’iine’, u cha’anil XVII Feria de la Salud de la Universidad Autónoma de Yucatán (UADY), tu kúuchil Multigimnasio “Socorro Cerón Herrera” yaan ichil Complejo Deportivo Kukulcán.
Ti’al u béeytale’ yaan u ts’a’abal 40 stand yéetel yaan u táakpajal 32 máako’ob kun e’esik jejeláas ba’alo’ob. Te’e ja’aba’, u nooyil le meyaja’ jets’a’ab ti’ u tuukulil “Cuidando tu salud para el bienestar de todos", tu’ux yaan u yantal u jejeláasil ba’alo’ob ti’al u toj óolal wíinik, xma’ bo’olil.
En español: UADY invita a la XVII Feria de la Salud: se ofrecerán estos servicios médicos gratuitos
Te’e meyaja’ yaan u béeytal u táakpajal je’el máaxake’, ts’o’oke’ táakmuk’ta’an tumen u jejeláasil mola’ayo’ob, beey k’a’ayta’ab tumen Edgar García Santamaría, máax jo’olbesik u meyajil Servicios de Salud, tu najil xook UADY.
Yéetel le meyaja’ táan u kaxta’al ka péektsilta’ak ich kaaj u k’a’ananil u kaláantikubáaj máak ichil u kuxtalil sáansamal, le beetike’ yaan u ts’a’abal jejeláas séerbisyos, yéetel yaan xan u ts’aatáanta’al u séeb ila’al wa yaan k’oja’an tsaayal ti’ máak, je’el bix diabetes, hipertensión arterial, ichil uláak’o’ob.
Beyxan yaan báakunas kun ts’a’abil, kóonsultas yéetel u examenesil ich yéetel xikin, u pruebasil VIH, mamografías, ichil uláak’o’ob. Je’el bix xan tsikbalo’ob yéetel u súutukil kaambalo’ob.
Xak'alutskíinsa'an tumen: Sasil Sánchez Chan
