Jump’éel chan wóol tuunich, asteroide, xíimbalta’ab tumen naabée espaasyal Lucy, ti’alinta’an tumen NASA te’e k’iino’oba’, tu’ux ila’ab k’a’anan ba’al, yaan ba’ax láak’intik asteroide Dinkinesh: jump’éel chichan uj.
Le je’ela’ béeychaj u yila’al tumen Lucye’ jmáan naats’ ti’ Dinkinesh, kex 480 miyoonesil kilómetros ti’ u yáax t’o’olil asteroides bak’ik Marte yéetel Júpiter. Le beetik naabee’ tu ch’a’aj u yoochel le chan ba’alo’, ka’alikil yaan kex 435 kilómetros náach ti’.
Yéetel le je’elo’ béeychaj u yojéelta’ale’, Dinkineshe’ ku p’isik kex 790 metros tu kóochil yéetel chan uj láak’intike’ ku p’isik 220 metros.
Úuchik u máan Lucy naats’ Dinkineshe’ chéen beeta’ab tumen NASA ti’al u kaxta’al uláak’ nukuch asteroides naats’tak ti’ Júpiter. Lucye’ káaj u meyaj tu ja’abil 2021, yéetel yaan u k’uchul tak tu’ux yaan ba’ax k’aaba’inta’an beey asteroides troyanos, tu ja’abil 2027.
Xak'alutskíinsa'an tumen: Sasil Sánchez Chan
