U jala’achil u noj lu’umil Yucatán tu k’a’aytaje’ Ichil le 17 tak le 20 ti’ noviembre ku taala’ yaan u táakpajal ichil ba’aax ts’o’ok u k’ajóolta’an beey Buen Fin, le beetike’ yaan u beetik próomosyoones, yaan xan u beetik deskuentóos tak tu 100 por sientoil yéetel yaan xan u ts’áak u jejeláasil bix u yúuchul bo’ol, ti’al beyo’ u yáanta’al kajnáalo’ob yéetel taak’in ku k’a’abéetkunsik.
U mola’ayil Junta de Agua Potable y Alcantarillado (Japay) tu k’a’aytaje’ yaan u ts’áak deskuentóo yóok’ol u 100 por sientoil ti’ bo’ol unaj u beeta’al ti’al muultáas yéetel rekargóos, ts’o’oke’ lelo’ yaan u yila’al kéen bo’olnak máak.
Beyxan ti’al u p’áatal al día máake’, deskuentose’ yaan u béeytal u ts’a’abal ti’al máax kun bin béentaniyáa, ba’ale’ beyxan ti’al máax kun bo’ol tu appil séelular, yéetel tu kúuchil Internet japay.yucatan.gob.mx.
Yaan u k’a’amal éeftektibóo, beyxan u táarjetasil debitóo yéetel kreeditóo, ts’o’oke’ yaan xan u ts’a’abal xma’ interesil ti’al le táarjetas táakbesa’ano’obo’.
Beey túuno’, u mola’ayil Instituto de la Vivienda del estado (IVEY) yaan xan u ts’áal deskuentoos tak tu 50 por sientoil ti’al ba’ax k’ajóolta’an beey intereses moratorios.
En español: Dependencias estatales en Yucatán ofrecen descuentos de hasta 100 por ciento por Buen Fin
Lela’ chéen yaan u ts’a’abal u ts’ook bo’olil cartera cobrable yéetel jurídica en liquidación, jts’a’ab ka’aj jets’a’ab u kóontratosil réegularisasyóon, úunibersal naj, beyxan ti’al u ma’alokúunsa’ab naj wa autoinstrucción.
Beyxan máaxo’obb yaan u muultaob tu táan u mola’ayil Secretarías de Seguridad Pública (SSP), de Salud (SSY) yéetel de Desarrollo Sustentable (SDS) je’el bix xan Agencia Transporte de Yucatán, yaan u páajtal u tse’elel ti’ob u 50 por sientoil bo’oj unaj u beeta’al.
Uláak’ ba’ax kun táakbesa’al Buen Fine’, leti’ u ts’a’abal u 50 por sientoil deskuento u muultáasil beyxan rekargóosil impuestos tu lu’umil Yucatán, je’el bix xan yóok’lal u meyaj máak, yóok’lal nomiináa, u wu’ulatal máak, u jóok’sa’al gaases ti’ le atmosferao’, beyxan u k’askúunta’al lu’um, u yáal yáanal lu’um yéetel ja’.
Ti’al túun u yutsil k’a’amal máak le deskuentosa’ unaj u bo’ota’al jumpuul tuláaka’al ba’ax ma’ili’ máanak u ts’ook k’iinil dekretóo. Ts’o’oke’ táaka’an xan íimpuesto ku ts’a’abal ti’al máax ku beetik obras máaterialées yéetel áantaj ku beetik u yantal ejercicio profesional.
Xak'alutskíinsa'an tumen: Sasil Sánchez Chan
