U kúuchil Centro Institucional de Lenguas de la Universidad Autónoma de Yucatán (CIL-UADY) tu ts’áaj k’ajóoltbil páayt’aan ti’al u kaambalilo’ob Cursos del Programa Institucional de Inglés (PII) ti’al u winalilo’ob enero – mayo 2024, ti’al beyo’ u béeytal u yoksa’al ju’uno’ob tu k’iinilo’ob jetes’a’an u ti’al.
Ti’ tsikbal jbeeta’ab yéetel máax jo’olbesik u meyajil CIL-UADY, Karina Abreu Cano, tu ya’alaj páayt’aane’ ku beeta’al ti’al u xoknáalilo’ob le noj najil xooko’, yéetel ti’al je’el máaxak u k’áate’. Le beetike’ táan u páa’ta’al u ts’íibtik u k’aaba’ kex 5 mil máako’ob, ti’al xook xa’ak’a’an u beeta’al Internet yéetel te’e najil xooko’, beyxan le ku yantal ch’éen ti’ Interneto’.
Tu tsikbaltaje’, yáax ba’ax k’a’abéet u beeta’ale’, leti’ u ts’íibtik u k’aaba’ mák ti’ Internet, ts’o’oke’ je’eb tu k’iinil 13 ti’ noviembre, yéetel yaan u k’a’alal tak 2 ti’ enero ti’ u ja’abil 2024; beyxan, tu sáasilkuunsaje’, k’a’abéet kex ts’oka’an u xookil séekundaryáa ti’al máaxo’ob ma’ u chuk 18 u ja’abil, ba’ale’ lela’ chéen ti’al máaxo’ob túumben u yokolo’ob xooki’.
En español: CIL-UADY lanza convocatoria para cursar el Programa Institucional de Inglés en 2024: Conoce las bases
Kéen okok u k’aaba’ máake’, ku yéeya’al u k’iinilo’ob xook yéetel ku bo’ota’al le kaambalo’. Ti’al máaxo’ob kun okol tu nu’ukbesajil PII yéetel Maaya Xooke’, jóoksa’an 12 tak 14 ti’ diciembre u ti’al.
Ka’alikil ti’al u túumben xoknáalilo’ob Inglés, Francés, Alemán yéetel Italiano, tu ya’alaj u k’iinilo’obe’ 15 ti’ diciembre tak 2 ti’ enero ti’ le túumben ja’abo’, tu kúuchilo’ob Central, Poniente yéetel Saki’. Xooke’ yaan u káajal 15 ti’ enero ti’ u ja’abil 2024. Wa taak u yojéelta’al uláak’ ba’alo’obe’ ku béeytal u xak’alta’al Facebook Centro Institucional de Lenguas (CIL).
Xak'alutskíinsa'an tumen: Sasil Sánchez Chan
