Juan “N”, juntúul xi’ipal 31 u ja’abil ka’ache’, jkíim úuchik u lúubul tak ka’aj téej u baakel u pool. U láak’o’obe’ tu jets’o’ob u ts’áak máatbil u oorganosil, u yoot’el, beyxan tejido musculoesquelético, le beetike’ béeychaj u líik’sa’al u kuxtal maanal 76 wíiniko’ob.
U meeyjulile’ ti’ jbeeta’ab tu najil ts’akyaj Hospital General de Zona 197, IMSS tu baantail México Oriente.
U jaats meyajil Coordinación hospitalaria de Donación de Órganos y Tejidos con Fines de Trasplante te’e najil ts’akyajo’ tu ts’áaj k’ajóoltbile’ u ka’ap’éel riñone’ túuxta’ab Unidad Médica de Alta Especialidad (UMAE) Hospital General “Dr. Gaudencio Gonzalez Garza” Centro Médico Nacional La Raza, IMSS yéetel u yicho’obe’ k’uch tak Banco de Tejido de Cornea.
U taamane’, túuxta’ab Hospital General de México “Dr. Eduardo Liceaga” ti’ u mola’ayil Secretaría de Salud Federal. Beyaxn tejido musculoesquelético yéetel u yoot’ele’ k’ujsa’ab Banco de Tejidos, Estado de México ti’ u mola’ayil Instituto de Salud mexiquenseil. .
Xi’ipal tu síijsaj kuxtale’, papaxk’a’abtabij, ts’o’oke’ chíimpolta’ab tumen máaxo’ob ku meyaj te’e kúuchilo’, beyxan tumen u láak’o’ob.
U mola’ayil IMSSe’ tu ya’alaje’, ti’al u jets’ik máak u k’áat u síij u oorganos yéetel tejidose’, ku béeytal u xak’alta’al u kúuchil Internet Centro Nacional de Trasplantes: gob.mx/cenatra wa u yokol máak tu kúuchil IMSS: imss.gob.mx/salud-en-linea/donacion-organos, ti’al u ts’íibtik máak u k’aaba’i’.
Xak'alutskíinsa'an tumen: Sasil Sánchez Chan
