Jmaaya ts’íibe’, tu beetaj nojoch páayt’aan ti’al ka ka’a chíimpolta’ak tsikbalo’ob suuk u yu’ubal te’e kaajo’obo’; leti’e’ tu k’amaj le viernes máaniko’, u noj chíimpolalil Premio de Literaturas Indígenas de América (PLIA) 2023, ka’alikil beeta’abik u noj cha’anil Feria Internacional del Libro (FIL) tu péetlu’umil Guadalajara.
Saraoe’, jts’íib, jkaambal máak yéetel u jk’aayil rap. Tu k’amaj chíimpolal úuchik u beetik u ts’íibil La estética narrativa del Tsikbal, tu’ux ku xo’okol jejeláas ba’alo’ob yóok’lal tu’ux u taal, beyxan ba’ax u k’áat u ya’al u maaya t’aanik tsikbal.
Leti’e’ síij tu kaajil Mocochá, Yucatán, ts’o’oke’ tu ya’aje’ tsikbalo’ob ku ya’alal te’e kaajo’obo’, ku béeytal u ts’íibta’alo’ob ti’al ka xo’okoko’ob.
Jts’íibe ku tukultike’, kex tumen yaan mola’ayo’ob ku ts’áako’ob u kúuchil ts’íib ich máasewal t’aano’obe’, láayli’ ku tukulta’al chéen wa jaytúul máaxo’ob beetik.
En español: Autor maya James Sarao recibe el Premio de Literaturas Indígenas en la FIL 2023
Tu súutukil úuchik u k’amik chíimpolale’, jts’íibe’ tu k’a’ajsaj u na’e’ leti’ máax ka’ans ti’ le t’aano’, ts’o’oke’ tu tsikbaltaj u k’a’ananil ko’olel tumen leti’ e’esik miatsil yéetel t’aan ti’ u paalal.
Gabriel Pacheco, máax jo’olbesik chíimpolale’, tu ya’alaje’, u ts’íib Saraoe’ yéeya’ab tumen “ku ye’esik bix u na’atal le Tsikbalo’, ts’o’oke’ ts’a’aban tu’ux jch’a’ab jayp’éel u tuukulilo’ob, beyxan ch’a’anukta’ab bix u yila’al tumen úuchben k’ajla’ayil yéetel le bejla’o’”:
Jmaaya ts’íibe’ tu k’amaj 300 mil pesos, yaan u jóok’sa’al u áanalte’il u ts’íib yéetel ts’a’ab u chan chíikulal le náajalo’.
Xak'alutskíinsa'an tumen: Sasil Sánchez Chan
