Sáamal 12 ti’ diciembree’ ku máan k’iin tu’ux ku k’iimbesa’al u ko’olebil Guadalupe, le beetike’ Arquidiócesis Primada de México tu ts’áaj k’ajóoltbile’ “tu jo’oloj óoxp’éel talam ja’abo’ob yóok’lal u pak’be’en k’oja’anil Covid-19e’, ku ch’a’ajolta’al xíimbalil ku beeta’al tu kúuchil Insigne yéetel Nacional Basílica de Guadalupe, je’el bix suuka’an ka’achij ti’al u k’iimbesa’al Virgen de Guadalupe”.
Ti’ jump’éel k’a’aytajil beeta’ab tumen Efraín Hernández Díaz, máax túumben ts’a’aban ti’al u jo’olbes Basílica de Guadalupe, tu ya’alaj “ki’imak u yóol u k’amik tuláakal aj-áalkabo’ob yaan u xíimbaltiko’ob Morenita del Tepeyac, tu yáax k’iinilo’ob diciembre”.
Beyxan tu beetaj páayt’aan ti’al ma’ u xu’ulul u kaláantikubáaj máak, ti’al u kaláanta’al u toj óolal tuláakal máak kun k’uchul te’elo’, ti’al beyo’ u béeytal u k’uchulo’ob te’e winalil diciembrea’ yéetel enero, ba’ale’ beyxan ti’al u beeta’al ba’ax k’a’abéet ti’al u “kaláanta’al yéetel yutsil úuchul ba’al” te’e kúuchilo’.
Tu ya’alaje’ “k’a’anan le k’iiino’oba’, tumen ya’abach máako’ob oksaj óoltik ko’olebile’, yaan u béeytal u k’uchulo’ob yiknal Emperatriz de América tu múulil Tepeyac, yéetel uláak’ jun jaats máako’obe’ yaan u béeytal u náats’alo’ob kex chéen ti’ Internet tu taanajo’obi’”.
Tu ts’áaj u níib óolalil ti’ tuláakal máak naats’ yanik ti’ Guadalupe ts’o’oke’ tu ya’alaj u yojel “ko’olebile’ yaan u sáasilkúunsa’al bej yéetel yaabilaj beyxan kananil”.
Tu ja’abil 2022e’, u kúuchil Basílica de Guadalupe tu k’amaj ichil u k’iinil 8 tak u píik’ sáastalil 12 ti’ diciembree’, kex 11 miyoonesil aj-áalkabo’ob. Le je’elo’ óoli’ leti’e’ beyka’aj suuka’an u k’uchul ka’achij te’elo’. Te’e ja’aba’ táan u páa’ta’al ka k’uchul láayli’ xan le beyka’ajo’.
Xak'alutskíinsa'an tumen: Sasil Sánchez Chan
