U múuch’báaxalil Leonese’, ikil múul meyajnaj yéetel scout Raúl Ortega, tu kóolaj yiknalo’ob Francisco Iran Briceño Herrera, juntúul táankelem xi’ipal ku báaxal booláa, ti’ u kaajil Cenotillo, Yucatán.
Tu jo’oloj beeta’ak Tryout tu méek’tankaajil Cenotillo, le 11 ti’ noviembre máaniko’, Francisco Briceño tu ye’esaj jach no’oja’an ti’al u k’amik booláa, le beetik Leonese’ tu jets’ajo’ob u kóola’al yiknal ti’al u káajal u baxtik beisbool profesyonal.
Briceñoe’ síij tu k’iinil 10 ti’ diciembre ti’ u ja’abil 2009, ts’o’oke’ jach tu ch’a’aj bej u báaxal ichil Liga Yucatán de Béisbol, tu’ux jach chíika’an u báaxal kéen jo’op’ok u jaats’ wa u k’amik booláa.
Xi’ipal xno’oj k’abile’ 14 u ja’abil walkila’. 1.75 u ka’analil yéetel 63 kilos u aalil. Ts’o’ok u ye’esike’ jach ma’alob u ch’iin tak yóok’ol 80 miiyáas ichil jump’éel ooráa.
Tu súutukil beeta’ab mokt’aane’, táakpaj scout Raúl Ortega; xi’ipal Francisco Briceño yéetel u láak’tsilo’ob, máax tu múuch’ujubáajo’ob tu kúuchil Parque Kukulcán Alamo.
U múuch’ báaxalil Leonese’ láayli’ u jets’maj u k’áat u ka’ans báaxal táankelemo’ob ti’al u jach kaambalo’ob, tumen beyo’ je’elili’ u líik’sik paalal u ts’áamaj u yóol te’e péetlu’uma’, yéetel uláak’ tu’uxo’ob ti’ u noj lu’umil México.
