Meyajo’ob ku beeta’al ti’al u k’a’amal ajxíinximbalo’ob, kex jach jump’íite’, ts’o’ok u chan ch’a’ak bej ti’ le ja’ab ta’aytak u ts’o’okola’, tumen yaan máako’obe’ uts tu yich u k’uchulo’ob je’elel tin maaya najo’ob meyajta’an óoli’ je’ex Airbnb. Ts’o’oke’ beey ts’o’ok xan u chúunul u meyaj u kúuchil Aeropuerto Internacional de Tulum, Felipe Carrillo Puerto, táan u páa’ta’al ka ya’abak xan máako’ob ku k’uchul xíiximbal te’e baantao’.
“Walkila’, tu kaajil Tihosucoe’ yaan jump’éel kolonial otel, ba’ale’ yaan xan maaya najo’obi’, ti’al beyo’ u béeytal u chan náajal máaxo’ob yaan te’e kaajo’obo’; to’one’ k-kaxtik bix je’ik u bejil ti’al u yantal le pluus je’ela’... yaan najo’ob ts’o’ok u yoksa’alo’ob tu kúuchil Airbnb, ba’ale’ yaan uláak’o’obe’ jumpáay bix u k’a’aytikubáajo’ob. Yaan ichil 13 tak 17 najo’ob ti’al u wu’ulabtal máak”, tu ya’alaj Felipe Dzidz Poot, máax chíikbesik Tihosuco Histórico.
En español: Preparan hospedajes ''tipo Airbnb'' en la zona maya de Quintana Roo
Jayp’éel winalo’ob paachile’, jaytúul ti’ máaxo’ob táakan ti’ múuch’ meyajo’ob k’amik u’ulabo’obe’, bino’ob Francia ti’al u táakpajalo’ob ti’ jump’éel k’a’anan noj meyaj ku beeta’al yóok’lal turismo. Kex tumen ma’ jach xoka’an tu beel beyka’aj ts’o’ok u ya’abtal máak kóojol xíimbal te’e kaajo’, ts’o’oke’ te’e k’iino’ob je’elile’ táan u ya’abtal tak 80 por siento ti’ le suuk u yantalo’, ts’o’oke’ europeoil u ya’abil máaxo’ob ku k’uchulo’ob.
Walkila’, ichil Red de Turismo Comunitario táaka’an waxakp’éel múuch’ilo’ob meyaj, ts’o’oke’ táan xan u yantal uláak’ túumbeno’ob ti’al xan u líik’sik u meyajo’ob, ti’al beyo’ u k’uchul tak 17 u p’éel u jejeláasil múuch’o’ob ti’ kaajo’ob je’ex Felipe Carrillo Puerto ba’ale’ beyxan José María Morelos.
“Tihosuco Histórico junmúuch’ meyaj yaan te’e kaajo’, ba’ale’ táaka’an xan ti’ Maya Ka’an, tu’ux yaan u jejeláasil much’o’ob meyaj tu’ux ku beeta’al ba’ax ku k’aaba’tik turismo de bajo impacto, ts’o’oke’ te’e k’iino’oba’ táan u yantal láak’inaj tumen Amigos de Sian Ka’an, ti’al u mu’uk’ankúunsa’al tuláakal mola’ayo’ob jok’a’an ti’ kajao’ob,t i’al xan u yantal nu’ukulo’ob meyaj yéetel ba’ax k’a’abéet ti’al u k’a’amal ajxíinximbalo’ob”, tu ya’alaj Felipe Dzidz Poot.
Xak'alutskíinsa'an tumen: Sasil Sánchez Chan
