Walkila’ yaan 183 mil 712 u túul xoknáalo’ob ti’ Educación Básica ti’ tuláakal u péetlu’umil Kaanpeche’ táan u ch’a’ajoltiko’ob xook bejla’a lunes 8 ti’ enero, tu jo’oloj ts’o’okok u yáax jaatsk’iinilo’ob je’elil ti’ u ja’abil xook 2023-2024.
Je’el bix jets’a’anil ti’ u tsolk’iinil xook tu lu’umil Kaanpeche’ paalalo’ob yéetel táankelemo’ob ti’ tuláakal u jaats xookil basikae’ táan u ch’a’ajoltiko’ob kaambal tu jo’oloj ts’o’okok xak kaambal-meyaj ti’al ajka’ansajo’ob yanchaj ichil 3 tak 5 ti’ enero máanika’.
En español: Regresan a clases 183 mil 712 estudiantes de nivel básico en Campeche
Beey túuno’, le beyka’aj xoknáalo’obo’ yaan u jatskubáajo’ob ti’ le 32 mil 138 u p’éel najilo’ob xook yaan ti’al préeskolaar; 96 mil 701 ti’al u xookil primaryáa; 45 mil 77 ti’al u xookil séekundaryáa, yéetel uláak’ 9 mil 796 mejen paalal kun káajalo’ob xan tu xookil íinisyaal.
Ti’ k’a’aytajil ts’íib jóok’sa’ab tumen u mola’ayil Secretaría de Educación (Seduc) ts’íibóolta’ab utsil ba’alo’ob ti’al le xoknáalao’obo’, beyxan ti’al le maanal 11 mil ajka’ansajo’obo’ yéetel máaxo’ob ku meyajo’ob te’e najilo’ob xooko’. Beyxan beeta’ab páayt’aan ti’al ka ts’o’oksa’ak le ja’abil xooka’.
Xak'alutskíinsa'an tumen: Sasil Sánchez Chan
