Españail péepene’ asab ma’alob u p’iiskunsik u k’íinalil u wíinkilal kéen u jayk’íinsubáajo’ob, ma’ je’ex u yúuchul yéetel británikail láak’o’ob, ba’ale’ kex bayo’ maas séeba’an u yu’ubiko’ob u chokoj yooxochajal ikil táan u bin u k’éexel yóok’ol kaab, le beetike’ sajbe’entsil yanik u ch’éejelo’obi’.
Le je’ela’ beey e’esa’abik tumen junmúuch’ ajxaak’al máako’ob, jo’olbesa’abo’ob tumen u máakilo’ob Universidad de Cambridge yéetel Instituto de Biología Evolutiva de Barcelona (centro mixto del Consejo Superior de Investigaciones Científicas, beyxan Universidad Pompeu Fabra), tu’ux ts’o’ok u beeta’al u jejeláasil xaak’al ik’elo’ob yaan Reino Unido yéetel Cataluña.
En español: Mariposas españolas, en riesgo de extinción por aumento de temperatura
Ba’ax chíikpaje’ jts’a’ab k’ajóoltbil tu pikil ju’unil Journal of Animal Ecology, ts’o’oke’ ku ye’esiko’obe’ le bix u bin u ya’abtal chokoj yooxole’, le mejen ba’alche’oba’ ku jelbesik xan ba’ax ku beetik ti’al ma’ u yu’ubik le ooxol’, ba’ale’ le españail péepeno’obe’ ku nu’uktik u xiik’o’ob yéetel k’iin, ti’al u béeytal u k’íinkunsikubáajo’ob, ba’ale’ britanikoilo’obe’ maas ku kaxtiko’ob k’íinal míikroklimáas.
“Tu lu’umil Españae’, péepeno’obe’ maas ya’abach k’iino’ob ku máansik tu’ux jach ma’alob yanik u k’íinalil, tumen mantats’ ooxol, ba’alae’ sajbe’entsil yanik u jach táaj chokotal”, tu ya’alaj Andrew Bladon, máax ku meyaj Departamento de Zoología ti’ u noj najil xook Universidad de Cambridge, yéetel juntúul ti’ u yuumil le xaak’alo’.
Xak'alutskíinsa'an tumen: Sasil Sánchez Chan
