Tu bejilo’ob u noj kaajil Jo’e’, u ya’abil le yaan k’íiwike’, yaan u chíikulal u ti’itsilo’ob yéetel le jats’utskíinsa’ano’ob, tu’ux xan ts’íibta’an u k’ajla’ayil kaaj ma’ jach k’ajóolta’ani’.
Jméerkadologóo Gabriel Alberto Pérez Llanes káaj u xak’altik jejeláas ba’alo’ob yóok’lal le chíikulalo’ob yaan te’e bejo’obo’, le beetik káaj u xokik ba’ax seen ts’íibta’an yóok’lalo’ob.
Leti’e’ káaj u na’aksik oochelo’ob ti’ Instagram ku k’aaba’tik Tour de Esquinas, ti’al beyo’ u béeytal u yu’ubal jejeláas ba’alo’ob yóok’lal ka’alikil u xíimbalta’al kaaj tu’ux ts’a’aban le chíikulalo’obo’.
En español: Organizan tour para conocer la historia detrás de las esquinas de Mérida
“Tene’ Jo’ kaja’anen, ba’ale’ síijen Saki’. Le ja’ab máanik káaj in na’aksik oochelo’ob tu’ux kin ts’áak k’ajóoltbil wa ba’ax yóok’lal le mejen dibujoso’”.
“Óoli’ tuláakal plaakáas yaan ti’its bejo’ob yaan u tsikbalil, ba’ale’ ma’ tuláakal ojéela’an ba’axten beey ts’a’abik u k’aaba’o’. Jump’éel ja’ab xáanchaj tin xaak’al”, tu ya’alaj máax jo’olbesik Loving Mérida, ti’ Instagram.
Beey túuno’, gáaleria Casa Bonitae’ tu páayt’antaj ti’al u táakpajal Noche Blanca, ts’o’oke’ jach ma’alob úuchik u k’a’amal, le beetik Gabriel Albertoe’ tu jets’aj u beetik xíimbal ti’al u cha’antalo’ob.
Jts’a’ab k’ajóoltbile’, xíimbalile’ yaan u beeta’al je’el bix u bin u k’áata’al tumen máako’ob tu kuentail Instagram Loving Mérida wa tu reedesil Casa Bonita, tu’ux yaan xan u ya’alal ba’ax súutukil kéen beeta’ak. Walkila’, u beeta’al xíimbalile’, ku tojoltik 400 pesos ti’al juntúul máak. Ku xáantal kex jump’éel ooráa yéetel ku beeta’al tu bak’pachil u noj kaajil Jo’.
Xak'alutskíinsa'an tumen: Sasil Sánchez Chan
