Ichil le 22 ti’ enero máaniko’, tak le 2 ti’ febrero ku taala’, máaxo’ob u k’áat u xok Bachillerato en Línea ku ts’a’abal tumen UADYe’ yaan u béeytal u táakpajalo’ob tu kantéen yéetel u ts’ook payalt’aanil ti’al u yokol máax tu ja’abil xook 2023-2024.
U kúuchil Unidad Académica de Educación Virtual (UAEV) ti’ u noj najil xook Universidad Autónoma de Yucatán (UADY) tu káajsaj u meyajil ti’al u ts’íibtik u k’aaba’ máaxo’ob u k’áato’ob xooki’. Ti’al u béeytale’, unaj u yokol máak u chup fóormularyóo ts’a’aban tu kúuchil uaev.uady.mx, tu’ux yaan u béeytal u na’aksa’al xan ju’uno’ob ku k’áata’al u ti’al.
En español: ¿Te interesa cursar el Bachillerato en Línea de la UADY? Esto debes saber
Manuel Herrera Góngora, máax ti’ k’ubéenta’an u beetik u meyaj UAEV, tu tsolaj ti’al le xookila’, ku béeytal u ts’íibtik u k’aaba’ ja’al máaxak kuxa’an tu noj lu’umil México wa tak ti’ táanxel lu’um u k’áat u ts’o’oks u xookil báachiyeratóo, ba’ale’ ti’ Internet.
“Xookil beya’, ku ts’áak u páajtalil u beeta’al je’el bix u bin u béeytal máak, tumen xoknáale’ ku k’u’ubul yiknal juntúul tutoor, máax ku meyaj yéetel ka’alikil tu xook, ts’o’oke’ ti’ lalaj áasignaturae’ yaan u yantal juntúul jka’ansaj je’el u yáantaj te’e plataformao’ wa yéetel jump’éel cha’an”, tu ya’alaj.
Xook ku beeta’al chéen ti’ Internete’, k’a’abéet xan u beeta’al jump’éel p’iskaambal tu’ux yaan u k’áata’al ti’ xoknáalo’ob jejeláas ba’alo’ob najmal u yojel máak.
Máaxo’ob kun yéeybile’ yaan u ts’a’abal k’ajóoltbil tu k’iinil 15 ti’ febrero ti’al beyo’, u ts’o’oksa’al u ts’íibtik u k’aaba’ob ti’al le xooko’.
UAEVe’ táakmuk’ta’an tumen sistema nacional de bachillerato. Ti’al u yojéelta’al uláak’ ba’alo’ob yóok’lal le xookila’, ku páajtal u xak’alta’al u reedesil UAEV wa u túuxta’al ts’íib te’ela’: atenció[email protected].
Xak'alutskíinsa'an tumen: Sasil Sánchez Chan
