Tu petenil Zavodovskie’ kaja’an u asab nojochil múuch’il pingüinos ti’ u jejeláasil barbijo (Pygoscelis antarcticus), ts’o’oke’ ku píitmáansik maanal jump’éel miyoon u túulal, ts’o’oke’ yaan xan uláak’ xíiwo’ob je’el bix musgos, líquenes yéetel xma’ baakel ba’alche’ob yaan tu bak’pachil le te’elo’.
Te’e peteno’ yaan jump’éel k’áak’ wiits láayli’ kuxa’ane’, ts’o’oke’ jáal ja’ bak’pachtike’ ya’ab u péek; u ts’ook ka’aj tuulnaj wiitse’, úuch tu ja’abil 2016, ts’o’oke’ táanchúumuk petene’ jbáal yéetel u yáal ta’an báanij. Yóok’lal u talamilu k’uchul máak te’elo’, ma’ ya’ab xaak’alo’ob beeta’anili’.
En español: Registran por primera vez la colonia de pingüinos más grande del planeta: Fotos
Ajxaak’al máako’ob ti’ Prospección Antártica Británica (BAS, yóok’lal bix u k’aaba’ ich inglése’), beyxan Consejo de Investigación del Medio Natural tu beetaj meyajo’ob yóok’ol le peteno’, ti’al u káajbal diciembre. Le beetike’ béeychaj u mo’olol k’a’anan chíikulalo’ob ti’al u xak’alta’al bix u kaláanta’al kuxtal yaan te’elo’.
Béeychaj u ch’a’abal u yoochel u nojoch múuch’ilo’ob pingüinos de barbijo yéetel uláak’ ba’alo’ob yaan te’e lu’umo’; meyajnaj droono’ob líik’sa’ab tak 50 meetróos u ka’analil. Wa tumen oochelo’ob ku ye’esiko’ob uts jóok’ike’, u k’áat u ya’alej yaan u béeytal u k’a’abéetkunsa’al ti’al u t’u’ulpachtal mejen múuch’o’ob tu paachil k’iin, ti’al beyo’ ma’ u seen ko’ojtal xaak’al te’elo’, mix xan u yantal sajbe’entsil ti’al máax beetik.
Xak'alutskíinsa'an tumen: Sasil Sánchez Chan
