Ba’ax ts’o’ok u beeta’ale’ ku béeytal u xak’alta’al chéen yéetel je’el ba’axak séelular, ku meyaj yéetel Android. tumen yaan u béeytal u ts’a’abal u áaplikaasyoonil Diccionario Interactivo en Lengua Maya, jts’a’ab k’ajóoltbil tumen u nu’ukbesajil Programa Institucional de Estudios del Pueblo y la Cultura Maya (Proimaya) ti’alinta’an tumen Universidad Autónoma de Yucatán (UADY).
Appee’ xma’ bo’olil u k’a’abéetkunsa’ali’, ts’o’oke’ ma’ xan k’a’abéet ti’ Internet ti’al u meyaji’. Walkila’, te’e yáax súutuka’, chéen u pilotoil jts’a’ab k’ajóoltbil, tumen chéen ti’ tabletaas ku meyaj, yéetel ti’ séelulares Android.
En español: Diseñan aplicación para consultar el Diccionario Interactivo en Lengua Maya
Nu’ukbesaje’ jts’a’ab k’ajóoltbil tumen Daniel Horta Moreno yéetel Luis Antonio Canché Briceño, ichil meyajo’ob ku taal u beeta’al tumen UADY tu winalil enero ti’al u chíimpolta’al maaya miatsil.
Beey túuno’, ichil le nu’ukbesajo’, ku béeytal u kaxta’al t’aano’ob, ts’o’oke’ ma’ talami’.
“Tak ilaje’, maayat’aane’ jump’éel t’aan kuxa’an sáansamal u k’a’abéetkunsa’al tu noojol-lak’inil México, le beetik péeknaj in wóol tumen, ikil ma’ in wojel wa yaan ka’ach jump’éel áaplikaasyóon ti’al u xak’alta’al maayai’, le beetik taal tin pool in beetik wa ba’ax yóok’lal le lu’uma’, ti’al beyo’ in chan áantaj xan”, tu tsikbaltaj Horta Moreno ti’ k’a’aytajil tu beetaj.
Xak'alutskíinsa'an tumen: Sasil Sánchez Chan
