Te’e k’iino’ob ma’ úuch ku máano’oba’, béeychaj u táabsa’al juntúul sak xok táant u síijile’, úuchik u k’a’abéetkunsa’al juntúul dron súubmarinóo máansa’ab tu jáal ja’ilo’ob California.
Sak xoko’obe’, leti’e’ ba’alche’ob maas jach táaj ya’ab máak u kíinsmaj ichil tuláakal yóok’ol kaab, le beetik óol talam u pakta’alo’ob beyo’ wa táant u síijilo’obe’. Lela’ míin tumen mix juntéen yáax ila’ak juntúul beyo’ jach tak walkila’.
En español: Captan por primera vez imágenes de un tiburón blanco recién nacido: Video
Carlos Gauna máax táabsil ba’alche’ob ma’ tu yaalak’ta’alo’obe’, yéetle u xoknáalil dóoktoradóo tu noj najil xook UC Riverside, Phillip Sternes, táan ka’ach u máansiko’ob kaamaráa te’e ich ja’o’, ti’al u kaxtiko’ob xoko’ob, tu k’iinil 9 ti’ julio ti’ u ja’abil 2023, naats’ Santa Bárbara, tu jáal ja’ilo’ob California. Le k’iin je’elo’, chíikpaj tu táan le drono’. Juntúul u mejenil xok táant u síijile’.
Sak xoko’obe’, óol samal booxo’ob tu yóok’olilo’ob yéetek sak tu yáanalo’ob, ba’ale’ le jch’a’ab u yoochelo’, ku p’isik kex 1.70 metros u chowakil yéetel jul sak.
“Tnojochkíinsaj oochelo’ob, ka’a t-ts’áaj ka xáanchajak u máan le kaamarao’, ti’ t-ilaj bix úuchik u jóok’ol chan neene’ ti’ u maamailo’”, tu ya’alaj Sternes ti’ k’a’aytajil ts’íib.
Xak'alutskíinsa'an tumen: Sasil Sánchez Chan
