Ichil ba’axo’ob ku yila’al kéen tse’elek u ju’unil ts’o’okol beele’ ti’ yaan tumen máaxo’ob núupe’ u láak’mubáaj; tumen juntúul ichilo’obe’ ma’ u jatsmubáaj ti’ yáax ts’o’okol beel; wa tumen ma’ u chuk u ja’abili’, beey tu ts’áaj k’ajóoltbil u xjueesáail Octavo Familiar de Proceso Oral, Laura Mejía Sosa.
Leti’e’ ku meyaj tu Poder Judisyaalil Ciudad de México, ts’o’oke’ tu ya’alaje’ u jach ya’abil u tse’elel u ju’unil ts’o’okol beele’, tumen juntúul ichil le ku túumben ts’o’oksik u beele’ ma’ u yáax jatsubáaj ti’ u yáax núup tu táan juntúul jues familiar.
Wa tumen ku béeytal ts’o’okol u beel kex beyo’, ku yantal u káajsa’al jump’éel juisyóo ti’al u yantal ba’ax jets’ik u tse’elel u ju’unil le túumben ts’o’okol beelo’; ti’al lelo’ yaan 10 juntúul fáamilar jueso’ob, máaxo’ob meyajtik ka yanak le ju’uno’.
Ti’ le ju’uno’ tu tsolaj, ku ya’alal wa jaaj yaan ba’ax beetik u tse’elel ts’o’okol beel, ba’ale’ ma’ u k’áat u ya’al wa diboorsyoi’, tumen ti’ u ts’ooka’, tu ka’atúulal máax ts’o’oka’an u beelo’obe’ ku mokt’antiko’ob bix kun na’atbil u jatskubáajo’ob.
Ka’alikile’, “wa tumen ku yantal u tse’elel u ju’unil ts’o’okol beele’, ku yantal u xak’alta’al u jeel ba’alo’ob, le beetik maas ku chan xáantal u beeta’al, tumen ku túuxta’al t’anbil juntúul ti’ le ka’atúulo’obo’, ti’al u yaktáantikubáaj yéetel le uláak’o’, tumen beyo’, kéen ts’o’okoke’ ku béeytal u je’ets’el wa unaj, wa ma’, u tse’elel le ju’uno’”, tu ya’alaj.
Xak'alutskíinsa'an tumen: Sasil Sánchez Chan
