Yanchaj u máan 79 ja’abo’ob ti’al u ka’a núupul k’iino’ob k’ajóolano’ob beey Miércoles de Ceniza, ti’al máaxo’ob oksaj óoltike’, jump’éel k’iin tu’ux ma’ tu yuk’ul máak yéetel ma’ tu yantal wa ch’a’abal ba’al je’ex suukile’, yéetel u k’iinil Día del Amor y la Amistad wa San Valentín, tu’ux ku ki’iki’ óolta’al yaabilaj yéetel núuptajil.
Yóok’lal le je’ela’, Jaime Pérez Guajardo, máax beetik u séekretarioil Dimensión de Bienes Culturales y Arte Sacro ichil Conferencia del Episcopado Mexicano (CEM), tu ya’alaje’, u núupul le k’iino’oba’, ti’ bisiestóo ja’abe’, ma’ unaj u pakta’al beey kúulpach ba’ali’.
Rosario Guerra, Consagrada del Regnum Christi, tu ya’alaje’ “ku núupul le k’iino’oba’ tumen Miércoles de Cenizae’ ku k’e’ek’exa’al, tumen najmal u xo’okol 40 k’iino’ob táanil ti’ u domingoil Pascua, ka’alikil tu k’iinil San Valentíne’ ku k’iimbesa’al romanoil santóo Valentín de Terni, máax tu k’iinil ma’ cha’aban ts’o’okol beel tumen éemperador Claudio II, ku xta’akum ts’o’oksik u beel táankelemo’ob, tak ka’aj yayaj jkíim tu k’iinil 14 ti’ febrero ti’ u ja’abil 270”.
En español: Luego de 79 años coinciden Miércoles de Ceniza y Día del Amor
Beey túuno’, ikil tu náats’al u k’iinil Cuaresma, Rogelio Cabrera López yéetel Ramón Castro, tu ya’alajo’obe’ “ya’abach ba’al najmal u píitjo’olta’al” tu lu’umil México, je’el bix “loobilajil, óoxtsil kuxtal, tuusil, ichil uláak’ ba’alo’ob”.
Tu ya’alo’obe’ “leti’ob beey pastoro’obe’ ma’ tu páajtal u sut ku paacho’ob ti’ ba’ax ku yúuchul, tumen kaaje’ tu yaj óolal, u ya’abile’ táanxel kaajil máako’ob u’uyik, máaxo’ob kaxtik uláak’ kuxtal tu paach nojoch talamilo’ob”.
Le beetike’ “k-k’áat óoltik ti’ tuláakal u kajnáalilo’ob Méxicoe’ ka p’a’atak paachil aal kuchil óol, ti’al ka yanak múul meyaj ti’ jump’éel lu’um ku paklan áantubáaj”.
Xak'alutskíinsa'an tumen: Sasil Sánchez Chan
