Ti’al u chíikbesa’al táan u yu’ubal ba’ax ku k’áata’al tumen u múuch’kabilo’ob Colectivo Maya Kanan Ts’ono’ot yéetel Guardianes del Agua ti’al ma’ u cha’abal u je’ebel wa u yáanta’al je’el ba’axak meyajil ti’al u yantal kúuchilo’ob ti’al u tséenta’al k’éek’eno’ob tu kaajil Homúne’, u mola’ayil Secretaría de Medio Ambiente y Recursos Naturales (Semarnat) tu k’a’ajsaje’ láayli’ táan u meyaj ti’al ma’ u cha’abal u meyajta’al ba’al beya’, je’el bix úuchik u ya’alal tumen máax jo’olbesik mola’ay María Luisa Albores González, tu k’iinil 13 ti’ julio ti’ u ja’abil 2022.
Ti’ k’a’aytajil ts’íib jts’a’ab k’ajóoltbil ti’ kúuchilo’ob k’a’aytik péektsilo’obe’, Semarnate’ tu ya’alaje’ táakbesa’ab jump’éel ju’un ku k’aba’tik Dictamen Diagnóstico Ambiental de la Actividad Porcícola en Yucatán, meyajta’ab tumen u jaats meyajil ambiental ichil u Jala’achil u noj lu’umil México, ts’o’oke’ jts’a’ab k’ajóoltbil tu winalil abril ti’ u ja’abil 2023, tu’ux ku xak’alta’al yéetel ku yila’al bix u jelpajal ba’al, wa bix u k’a’amal u meyajil u tséenta’al k’éek’eno’ob tu lu’umilo’ob Yucatán.
En español: Semarnat confirma: No otorgará permisos para granjas porcícolas en Homún, Yucatán
Beyxan, leti’e’ tu ya’alaj láayli’ u k’ubik u t’aan u meyaje’, úuchik u yantal ka’ap’éel mokt’aan beeta’ab yéetel u jala’achil u lu’umil Yucatán, tu’ux ku táakbesa’al ka yanak múul meyaj ichil mola’ayo’ob beyxan jala’acho’ob, ti’al u yantal jump’éel tsoolil yaan u k’aaba’tik Padrón de Unidades de Producción Porcícola, tu’ux yaan u je’ets’el ba’ax unaj u nu’ukta’al ti’al u yila’al ka no’ojan meyajnak yéetel ti’al u yutsil xíimbal ba’ax ku séeba’an beeta’al tumen kaajo’ob tu’ux ts’o’ok u yila’al ya’abach ba’al táan u jelpajal wa táan u k’astal tumen u tséenta’al k’éek’eno’ob.
“Semarnate’ ma’ táan u p’atik meyaj ku beetik ti’al u ts’aatáantik u yu’ubik ba’ax ku k’áatik kaaj ti’al u le noj talamila’, tumen yaan ba’al u yil yéetel yóok’ol kaab, beyxan u lu’umil yukatanilo’ob, le beetike’ ku ki’imak óoltik xan bix u chíimpolta’al u páajtalil kaajo’ob”, a’alab te’e ju’uno’.
Xak'alutskíinsa'an tumen: Sasil Sánchez Chan
