U mola’ayil Secretaría de Marina tu ts’áaj k’ajóoltbile’, u jaats meyajil Décima Tercera Zona Naval, túuxta’ab meyaj jump’éel u péepen k’áak’il Armada de México, ti’al u yila’al wa ku béeytal u tu’upul k’áak’ jóop tu k’áaxil Reserva Ecológica de Dzilam de Bravo, ka’alikil u múul meyaj yéetel u mola’ayil Secretaría de Protección Civil de Yucatán, Comisión Nacional Forestal, la Secretaría de Desarrollo Urbano y Medio Ambiente yéetel u jo’olpóopil u kaaji Dzilam de Bravo, xaman-lak’inil u lu’umil Yucatán.
Meyaje’ beeta’ab úuchik u k’áata’al áantaj tumen Protección Civil ti’ u lu’umil Yucatán, úuchik xan u ts’a’abal k’ajóoltbil ts’o’okili’ u yáalkab k’áak’ kex 43 kiloometróos kuadradóos, le beetike’ yanchaj u k’áata’al tak éelikopteróo yéetel le béeychaj u k’ujsa’al kex 2 mil 500 u liitrosil ja’, lalaj juntéen u káargarta’al, tumen k’as talam u k’uchul máak tak tu’ux ku yelel k’áax, tumen mina’an u bejil u yokol kisbuuts’i’.
En español: Buscan sofocar incendio forestal en la Reserva Ecologica de Dzilam de Bravo, Yucatán
Yóok’lal le je’elo’, yanchaj u yáax bin ilbil jach tu’ux t’aabal k’áak’ te’elo’; ila’abe’ k’a’abéet kex jo’otéen kaargáas te’e tu’ux jach t’aabalo’. Weka’ab kex 12 mil 500 u liitrosil ja’, ts’o’oke’ beey kun meyajtbil tak kéen láaj tu’upuk.
Xak'alutskíinsa'an tumen: Sasil Sánchez Chan
