Maamatsilo’ob ku biinsik u paalal tu najil xook Preescolar K´aan Lool, tu chan kaajil San José Oriente, ti’ u méek’tankaajil Hoctúne’, tu beeto’ob jump’éel meyaj tu’ux táakbesa’ab jump’éel ba’al úuch ka’anak tumen kch’i’ibalo’ob. Maamatsilo’ob yéetel u paalilo’ob ku xooko’ob te’e kúuchilo’, tu beetajo’ob áanalte’ob chéen ba’axe’ tu wáalilo’obe’ jts’a’ab xokbil chuuyi’.
Te’e ja’aba’ U K’iinil U Yáax T’aanil Wíinike’, jula’ab ti’al u chíimpolta’al kaambal. K’aaba’inta’ab "Educación multilingüe: un pilar del aprendizaje intergeneracional", tu tsikbaltaj jka’ansaj Ángel May May, máax péektsilt u beeta’al le meyaja’. Leti’e’ káaj u tukultik bix je’el u mu’uk’ankúunsik maaya ch’i’ibal, le beetik tu tuklaje’ u kanik paalal bix u beeta’al chuuye’ je’el u beetik k’ajóoltiko’ob uláak’ ba’al ti’ u miatsil paalili’.
En español: En Hoctún promueven la identidad maya con libros bordados en Xokbil chuuy: Galería
“Kaambal ku ye’esa’al te’e najil xooka’, ma’ chéen meyaj kti’ali’, tumen tene’ kin wu’uyike’ u ti’al le je’el ka síijeno’, ts’o’oke’ kin ts’áak in wóoli’ ti’al u béeytal u kaambal in xoknáalo’ob, tumen k-kaajale’ najmal xan u chíimpolta’al yéetel u kaláantpajal. Le beetike’, tch’a’aj chuuy, tumen ba’al suuk u beeta’al tumen kaaj; beyo’, ku béeytal u núupul kaambal ku yantal ti’ najilo’ob xook yéetel u maaya ch’i’ibal”, tu tsikbaltaj jka’ansaj Ángel May May, máax jo’olbesik najil xook.
Óoli’ ti’al u winalil octubre ti’ le ja’ab mánaiko’, jka’ansaj Ángele’ tu káajsaj le meyaja’. Ti’al u béeytale’, táakbesa’ab 20 na’tsilo’ob máaxo’ob beet kamp’éel áanalte’ob, tu’ux tu ts’áajo’ob xok chuuy tu wáalilo’ob.
Chuya’ab jejeláas woojo’ob yéetel oochelo’ob. Beey túuno’, Béeychaj u nupa’al chuuy yéetel kaambal.
“U k’a’ananil meyaje’, u yu’ubik xoknáalo’ob noj ba’al u miatsilo’ob, beyxan u t’aanilo’ob yéetel u chuuyil, ti’al beyo’ u káajal xan u kaláantiko’ob ma’ u xu’ulul t’aan, mix u jeel ba’alo’ob ti’ u kaajo’obi’”, tu tsolaj Ángel. Beyxan, leti’e’ tu tsolaj u yáax jaatsil meyaje’, ku kaxtik u ka’anal u woojilo’ob maaya t’aan, wa bokaalées, beyxan tu paachil k’iine’ ka béeyak u ya’abkunsa’al áanalte’ob beya’, tu’ux ka ts’a’abak uláak’ ba’alo’ob je’el bix: abecedario, boono’ob yéetel oochelo’ob, ti’al u ye’esal xan tu táan u jeel máako’ob.
Xak'alutskíinsa'an tumen: Sasil Sánchez Chan
