Xooch’ suuk ka’ach u yantal tu kaajil Nueva Yorke’, kíim úuchik u jats’ik u pool, beey úuchik u ts’a’abal k’ajóoltbil tumen zoologos, tu jo’oloj u máan jump’éel k’iin u p’uchubáaj tu táan u pak’ jump’éel kúuchil, le beetik u jo’olpóopiloob jaaje’ táan u tukultiko’ob u beetiko’ob uláak’ xaak’al ti’al u yila’al wa ma’ k’oja’an ka’ach le ch’íich’o’.
Kajnáalo’ob túune’, tu jach ki’iki’ óoltajo’ob Flaco ka’achij, tumen tu kanaj kuxtal kex tu chan juunal. Ajkanan kaajo’ob túune’, láayli’ u kaxtiko’ob wa yaan máax cha’a u jóok’ol tu yoch yaan ka’ach Zoológico de Central Park walkil jump’éel ja’ab paachil.
Xaak’al beeta’abe’, tu chíikbesaj Flacoe’ jach ma’alob yanik ka’achij, kex 1.89 kiilos u aalil, ts’o’oke’ ku tsa’ayal u maan u chuk u yo’och, kex tumen tu chichnil ka’aj oksa’ab kaláantbil te’e kúuchilo’, walkil kex 13 ja’abo’ob paachil.
Ka’aj ila’ab Flaco kimene’, ti’ yaan aktáan u kúuchil Upper West Side, tu kaajil Manhattan.
Xak'alutskíinsa'an tumen: Sasil Sánchez Chan
