U kúuchil Dirección General de Epidemiología ti’ u mola’ayil Secretaría de Salud (Ssa) tu ts’áaj k’ajóoltbil jayp’éel k’iino’ob paachile’, ti’ le beyka’aj k’iino’ob ts’o’ok u yáalkab ti’ le ja’aba’, ojéela’an ts’o’ok u yantal 4 mil 593 máax ti’ jtsa’ay dengue, ts’o’oke’ ti’ le je’elo’obo’ 2 mil 382 u túul máake’ jatsa’ab talam yanik ti’; lelo’ ku chíikbesik u 48 por sientoil tuláakal máax ti’ pa’ak’ le k’oja’anila’.
En español: Este año suman 4 mil 593 casos de dengue; más de la mitad son graves
Ichil u tsolmeyajil Situación Epidemiológica de Dengue en México a’alabe’, ichil u p’isk’iinil 6, ts’ook xak’alta’ab 14 ti’ febreroe’, ojéelta’ab yanchaj uláak’ 849 u túul máax ti’ jtsa’ay le k’oja’anilo’, ts’o’oke’ ti’ le je’elo’obo’ 436 tu chíikbeso’ob sajbe’entsil u talamtal dengue ti’ob. Péetlu’umo’ob tu’ux asab ya’ab u tsa’ayal k’oja’ane’ ti’ yaan Guerrero, Tabasco, Colima, Campeche, Quintana Roo yéetel Veracruz. Tumen ti’ ku múuch’ul u 74 por sientoil máax ti’ k’oja’anchajo’ob.
Tak walkila’, u mola’ayil Ssa ma’ u jets’ wa yaan máax ts’o’ok u kíimil tumen, ba’ale’ táan u xak’altik ba’axten kíim 56 u túul máako’ob.
U mola’ayil Organización Panamericana de la Salud (OPS) ku ya’alike’ tu lu’umil Américase’, kex 500 miyoonesil máako’obe’ sajbe’entsil yanik u tsa’ayal ti’ob dengue, tumen jump’éel k’oja’anil ku pa’ak’al kéen chi’ibik máak tumen k’oxol yaan u biirusil.
Xak'alutskíinsa'an tumen: Sasil Sánchez Chan
