U múuch’il Comisión de Trabajo y Previsión, ichil Senadoe’ tu éejentaj k’eexil ku tukulta’al u beeta’al tu a’almajt’aanil meyaj, tu’ux ku ya’alal unaj u ya’abkunsa’al u bo’olil aguinaldo ichil 15 tak 30 k’iino’ob ja’ab man ja’ab; ts’o’ok u máan 54 ja’abo’ob ma’ beeta’ak mix jump’éel k’eexil ti’ le bo’olila’, ts’o’oke’ kaabal yaan ti’ le beyka’aj ku bo’ota’al ti’ uláak’ u lu’umilo’ob Latinoamérica.
Máax jo’olbesik múuch’ meyaje’, u senadoril Morena, Napoleón Gómez Urrutia, tu ya’alaje’, ts’o’ok u ts’a’abal yáax xáak’ab ti’al u nojba’alkúunsa’al meyaj, tumen diktaamene’ táakmuk’ta’ab tumen 11 yéeyajo’ob.
Ti’ tsikbal tu beetaje’, tu ya’alaj yanchaj jun jaats máako’ob ma’ tu chíimpoltiko’ob, ba’ale’ ba’ax ku kaxta’ale’ leti’ ka ya’abak bo’ol ma’ k’éexek lik’ul u ja’abil 1970, tumen ma’ k’éexek jumpuuli’, ts’o’oke’ chéen 15 k’iino’ob ku bo’otal ichil jump’éel ja’ab, tumen le je’ela’ ku péeksik xan bix u suut taka’in te’e mola’ayobo’.
En español: Reforma del aguinaldo en México: Aprueban en comisión del Senado aumentar el pago de 15 a 30 días
Ka’aj ts’a’ab k’ajóoltbil diktaamene’, jsenador Gómez Urrutiae’ tu ya’alaj “aguinaldoe’ ma’ chéen jump’éel páajtalil chíimpoltik kmeyaj, tumen jump’íit ba’ax ku su’utul yóok’lal beyka’aj k’iin ku meyaj kex ts’o’ok u máan u súutukil u beetik máak”.
Le beetike’, tu ya’alaj “k’a’anan u yantal poliitkáas tu lu’umil México tu’ux ka mu’uk’ankúunsa’ak meyaj ku beetik wíinik, ti’al u yutsil u kuxtal máak”.
K’eexil ku tukulta’al u k’éexele’, leti’e’ yaan tu jaatsil 87 ich Ley Federal del Trabajo, ts’o’oke’ a’alab Méxicoe’ ti’ yaan ichil lu’umo’ob tu’ux asab ya’abach ooráas ku meyajta’al. “Je’ex u ya’alik Confederación Patronal de la República Mexicana (COPARMEX), Méxicoe’ u lu’umil OCDE tu’ux asab ya’ab u yúuchul meyaj, tumen ku yúuchul kex 2 mil 137 ooráas ichil jump’éel ja’ab, ba’ale’ ti’ uláak’ noj lu’umo’ob táakano’ob xan te’e mola’ayo’, ku xáantalo’ob kex mil 730 ooráas”.
Xak'alutskíinsa'an tumen: Sasil Sánchez Chan
