Le viernes ku taala’, yaan u máan U K’iinil Ko’olel Yóok’ol Kaab, k’ajóolta’an xan beey 8M, múuch’o’ob tu’ux táakan ko’olelo’ob ti’ u kaajil Jo’e’, ts’o’ok u beetiko’ob páayt’aan ti’al máax u k’áat táakpajal ti’ xíimbalil líik’saj t’aan kun beetbil te’e ja’aba’, ti’al u yilkubáajo’ob tu kúuchil Monumento a la Patria.
Páayt’aane’ beeta’ab tumen Red de Acompañamiento Yucatán, beyxan Casa Colibrí yéetel Rueda de Mujeres, ichil uláak’o’ob. Ts’o’oke’ táan u páa’ta’al u k’uchul ko’olel láas 6 u taal u chíinil k’iin. Beey túuno’, k’i’itbesa’ab t’aan u ti’al ti’ reedes sociales, tu’ux a’alabe’ ku béeytal u táakpajal ko’olel yéetel trans ko’olel xan.
U múuch’kabil Colectiva Madres Feministas Yucatán láayli’ xan páayt’aanaj ti’al u táakpajal na’tsilo’ob yéetel xch’úupalalo’ob.
Je’el bix lalaj ja’abe’, táan u tukulta’al u beeta’al le xíimbalila’ ti’al u yawta’al ti’ kaaj ba’ax le seten talamilo’ob ku máansik ko’olel, yéetel ti’al u k’áata’al ka chíimpolta’al u páajtalil ko’olel, tumen tak walkila’ ma’ ch’éenek u loobilta’alo’obi’.
En español: Marcha por el #8M en Mérida saldrá del Monumento a la Patria
Xak'alutskíinsa'an tumen: Sasil Sánchez Chan
