Tu k’iinil jo’oljeak 10 ti’ marzoe’, chúun uláak’ juntéen u beeta’al u noj k’iimbesajil áanalte’ob: Feria Internacional de la Lectura Yucatán 2024 (Filey), suuka’an u beeta’al tu noj kaajil Jo’ ja’ab man ja’ab, tu kúuchil Centro de Convenciones Siglo XXI.
Le je’ela’ jump’éel u asab nojochil k’iimbesaj ku beeta’al, tu’ux ku mu’uch’ul áanalte’ob yéetel ajts’íibo’ob, beyxan ku yantal múuch’tambalo’ob, tsikbalo’ob yéetel u jeel meyajo’ob ti’al u náats’al máak u k’ajóolt ba’ax ku taal kéen xooknak máak.
Beyxan, je’el bix ts’o’ok u suuktal u beeta’ale’, tu kúuchil Salón Ek Balam ku yantal u jejeláasil najilo’ob, mola’ayo’ob yéetel máako’ob konik yéetel e’esik áanalte’ob, nu’ukulo’ob ti’al kaambal, ichil uláak’ ba’alo’ob. Ichil túun le je’elo’obo’, yaan jump’éele’, le ts’a’aban u xookolil 63, beeta’an tumen Escritores Mayas Independientes, tu’ux ku béeytal u kaxta’al ya’abach áanalte’ob yéetel nu’ukulo’ob beeta’an ich maayt’aan.
En español: Inauguran la edición 2024 de la Feria Internacional de la Lectura Yucatán (Filey)
Te’elo’ yaan jejeláasil meyajo’ob beeta’an, je’ele bix u áanalte’il ik’il t’aan, tsikbalo’ob, ti’al u kaxta’al t’aano’ob, ti’al u yojéelta’al ba’axo’ob yaan ba’al u yil yéetel maaya miatsil, ti’al u kanik máak le t’aano’, yéetel uláak’o’ob. U mu’uch’ul tuláakal le áanalte’oba’ beeta’ab tumen jts’íib Feliciano Sánchez Chan yéetel Minelia Chan, máaxo’ob k’áatik ti’ tuláakal máak u meyajtmaj wa ba’ax taak u ye’esik wa u konik ka’alikil táan Fileye’, ka u biinso’ob te’e kúuchila’, tumen beyo’ ku maas ya’abtal u ba’alumbáaj maaya ts’íib.
Te’e ja’aba’, yaan xan u jeel ba’alo’ob ku yila’ali’, je’el bix mejen páawo’ob, wa boolsas, yéetel u maaya ts’íibil, nook’o’ob, mejen pikil ju’uno’ob ti’al u yúuchul ts’íib, beyxan jats’uts ju’uno’on ti’al tak’bil, ichil uláak’ ba’alo’ob.
U ts’ook k’iinil ti’al u xíimbalta’al noj cha’ane’, yaan u beeta’al tu k’iinil domingo 17 ti’ marzo. Tukulta’an u chukik, tak tu ts’ook k’iinile’, kex 600 u p’éel meyajo’ob ichil tsikbalo’ob, e’esajilo’ob, xooko’ob, múuch’o’ob yéetel tse’eko’ob, tu’ux yaan xan u beeta’al jayp’éel ich maaya t’aan xani’, je’el bix u Múuch’tambalil Ajts’íibo’ob ich Máasewal T’aano’ob tu ja’abil 2024; beyxan kaambal ti’al u ts’íibta’al k’aay tuukulo’ob ich maaya t’aan yaan u meyajta’al tumen u múuch’kabil Xkusamo’ob, ichil uláak’ ba’alo’ob.
Xak'alutskíinsa'an tumen: Sasil Sánchez Chan
