Tu ja’atskab k’iinil jo’oljeake’, beeta’ab tu C5il Cancúne’ u múuch’tambalil Consejo Estatal de Protección Civil ti’ u péetlu’umil Quintana Roo, tu’ux táakpaj xan u xkóordinadorail Protección Civil, Laura Velázquez Alzúa, ti’al u ts’aatáanta’al yéetel u nu’uktal bix táan u taal chak ik’al Beryl.
Le beetik xane’, múuch’ meyaje’ tu jets’aj ma’ táan u xóot’ol le sesiono’.
En español: Lejanía de Beryl ''nos permite prepararnos con anticipación'': Protección Civil Nacional
“Táan kmúul meyaj ti’al u yutsbe’enil u kaajil Quintana Roo”, tu ya’alaj Velázquez Alzúa, máax tu ts’áaj k’ajóoltbil Beryl te’el súutuko’, ti’ yaan ka’ach tu k’áak’náabil Mar Caribe, óol maanal 2 mil kilómetros ti’ mexikoil jáal ja’, ts’o’oke’ yéetel lelo’, “ku cha’ak klíik’sikbáaj tu beel ma’ili’ k’uchuki’”.
Ti’ tsoolmeyaj beeta’abe’, a’alab táan u páa’ta’al ka yanak tu k’iinilo’ob chak ik’ale’, kex ichil 20 yéetel 23 u p’éelal ichil u ja’il Atlántico, ts’o’oke’ tu jo’oloj káajak u k’iinile’ (chúun tu yáax k’iinil junioe’) ts’o’ok u yantal óoxp’éeli’, ts’o’oke’ lelo’ ku chíikbesik u 13 por sientoil ti’ tuláakal.
Ku tukulta’ale’ Beryle’ jach séeb úuchik chak ik’altal, ts’o’oke’ leti’e’ yáax ts’o’ok u k’uchul tak tu muuk’il 5 tu séeba’anil (ichil junio yéetel julio); tumen lelo’ tak agosto ku yúuchul ka’achij.
Laura Velázqueze’ tu k’a’aytaj u ts’a’abal jump’éel u kúuchil kanan tu kaajil Cancún, beyxan tu playa Linda, ts’o’oke’ je’el bix kun ilbil kun jaats’ chak ik’ale’, yaan u yila’al wa k’a’abéet u je’ebel uláak’ tu noojolil le péetlu’umo’.
Xak'alutskíinsa'an tumen: Sasil Sánchez Chan
