Talkoe’, jump’éel natural míineral ku jach k’a’abéetkunsa’al ti’al u beeta’al kosmeetikos yéetel nu’ukulo’ob ti’al mejen neene’obe’, “míin jump’éel ba’al je’el u tsa’aysik ts’unu’us, wa kaancer, ti’ wíinik”, a’alab tumen Agencia Internacional para la Investigación del Cáncer, ku meyaj tu yáam Organización Mundial de la Salud (OMS).
Ichil xaak’al beeta’ab tumen 29 u túul máako’ob kaambanaja’an te’el kúuchilo’, ila’abe’ yaan jejeláas meyajo’ob e’esike’ tu bin u ya’abtal jaytúul máax ti’ tsaayal u ts’unusil obaaryos ko’olel wa tumen k’a’abéetkunsa’ab talko ti’yiit.
En español: La OMS determina que el talco es ''probable cancerígeno'' para humanos
Máaxo’ob beet xaak’ale’ ku ya’alik taalkoe’ ti’ yaan tu ka’a t’o’olil maas ka’anal ichil ba’axo’ob ku yila’al ma’ xaan ku tsa’aysik ts’unus, a’alab ti’ k’a’aytajil ts’íib.
Uláak’ ba’al sajbe’entsil ti’ talkoe’ míin tumen ku tukulta’ane’ k’aschaja’an yéetel asbestos, ku tukulta’ale’ ku tsa’aysiko’ob ts’unus; jump’éel sajbe’entsul ba’al ti’al máaxo’ob ku meyaj kéen jo’op’ok u beeta’al ba’ale’ beyxan ti’al kaaj k’a’abéetkunsik, tu ya’alaj.
Beyxan u kúuchil OMS tu ya’alaje’, acrilonitrilo, jump’éel kimikóo ku meyaj kéen beeta’ak polímeros ti’al u beeta’al nook’ yéetel plaastikos ichil uláak’ ba’alo’ob, láayli’ ku tsa’aysik ts’unus, ba’ale’ lelo’ maas ya’ab ti’ le ku tukulta’al ku jóok’ol ti’ talko.
Xak'alutskíinsa'an tumen: Sasil Sánchez Chan
