Bangladeshil xoknáalo’obe’ tu ts’áajo’ob u yóolo’ob ti’al u ma’ u xóot’ol líik’saj t’aan ku beetiko’ob, tu’ux ts’o’ok u yantal 155 kimeno’ob, ts’o’oke’ walkila’ táan u k’áatiko’ob ka u p’at u meyaj yáax ministra Sheikh Hasina, kex tumen justiisyáa te’elo’ tu jets’aj le domingo máanika’ u p’atik flexiiblée u sisteemail bo’ol ti’al u yantal meyaj ti’ kaaj.
Tribunal Supremo de Bangladés tu ya’alaje’ ma’ táan u jach ko’ojkíinsik le bajux ku bo’otal ti’al u béeytal u yantal meyaj ti’ junjaats kaaj, ba’ale’ kex beyo’ ma’ tu tselaj tuláakal le ba’ax jets’a’an yóok’olalo’.
En español: Manifestantes asaltan una prisión y liberan a cientos de presos en Bangladesh
Ba’ax jets’a’abe’ ku ts’áak u páajtalil ma’ u jach talamtal u yantal meyaj ti’ u paalil ajk’atuno’ob, ba’ale’ lelo’ tu beetaj u jach yantal xwo’okino’ob, ts’o’oke’ tak walkila’ ts’o’ok u yantal kimeno’ob tumen.
Tribunal Supremoe’ unaj ka’ach u jets’ik u t’aan le winal ku taala’ ti’al u ya’alik w aku chíimpoltik wa ma’ le sistemao’, ba’ale’ tu táanilkúunsaj u t’aan úuchak u yilik xwo’okin yanchaj táan u beetik u tíitpajal le kaajo’, Soldadose’ ts’o’ok u túuxta’alo’ob te’el noj kaajo’obo’ tumen ajkanan kaajo’obe’ ma’ tsa’ayako’ob u jets’iko’ob ba’ali’; Internete’ ma’ ti’ tuláakal maán yaan desde le jueves máanika’, ts’o’oke’ lelo’ ma’ tu jach cha’ik u ts’a’abal ojéeltbil ba’alo’obi’.
Beey túuno’, le ba’ax tu ya’alaj tribunale’, leti’ beyka’aj meyaj p’ata’an ti’al le máako’obo’, tumen ti’ 56% yaan ka’ache’ chéen jp’a’ay 7%, ba’ale’ lelo’ ma’ uts úuchik u k’a’amali’.
U múuch’ xookil “Students Against Discrimination” tu ya’alaje’ ma’ tun bin xu’ulul líik’saj t’aan tak “kéen chíimpolta’al ba’ax ku ya’aliko’ob tumen Jala’ach”.
Xak'alutskíinsa'an tumen: Sasil Sánchez Chan
