Ya’abach máako’ob ts’o’ok u kíimil walkila’, yéetel yaan u jeelo’ob ts’o’ok xan u yúuchul loob ti’ob te’el k’iino’oba’, yóok’olal líik’saj t’aan táan u yantal tu lu’umil Bangladesh, tumen máaxo’ob ku táakpajale’ táan u k’áatiko’ob ka jáawak u meyaj le jala’acho’, máax táan u ya’alike’ yaan “sáabotaje!”, ts’o’okole’ le domingoa’ tu xot’aj Internet te’el kaajo’, ikil u kaxtik u jáawsik xwo’okino’ob.
U jach k’a’anan pikil ju’unil ku jóok’sa’al ich bengalí t’aan te’el noj lu’umo’, Prothom Alo, tu ts’áaj k’ajóoltbile’ ts’o’ok u yantal kex 95 kimeno’ob yóok’olal xwo’okinil yanchaj le domingo máanika’, tu’ux táaka’an tak 14 u túul ajkanan kaajo’ob. Canal 24e’ tu k’a’aytaje’ 85 u túul máak kíimij.
En español: Suben a 73 los muertos por enfrentamientos en Bangladesh
Ejersitoe’ tu k’a’aytaj yaan u beeta’al túumben toque de queda, tu’ux táaka’an tak u noj kaajil Dacca, beyxan uláak’ kaajo’ob, ts’o’oke’ najmal u chíimpolta’al le p’iisila’ tu yáak’abil le domingoa’, yéetel ma’ jets’a’an tak ba’ax k’ini’.
Jala’ache’ ts’o’okili’ u yáax jets’ik ka’ach toque de queda tu’ux ma’ táakbesa’ab jayp’éel u kaajilo’ob Dacca yéetel uláak’ jayp’éel tu’uxo’ob. Yáax ministra Sheikh Hasinae’ tu k’a’aytaj máaxo’ob bin ts’o’ok u táakpajalo’ob te’el “sabotajeo’” yéetel ti’al u k’askúunta’al ba’al ikil táan bin u líik’sa’al t’aane’ ma’ bin xoknáalo’obi’, chéen k’aak’as máako’ob.
Máaxo’ob ku líik’sik u t’aano’obe’ táan u k’áatiko’ob ka u p’at u meyaj Hasina, tu jo’oloj yanak uláak’ líik’saj t’aano’ob tu winalil julio; káajsa’ab tumen xoknáalo’ob máaxo’ob k’áatik ka’ach ka xu’uluk bo’ol jets’a’ab unaj u beeta’al ti’al u yantal meyaj ti’ máak ichil u mola’ayilo’ob jala’ach, ba’ale’ le xwo’okinilo’ob piimchajo’ob tak ka’aj jach káaj loobilajil yéetel le ts’o’ok u yantal maanal 200 u túul máak kíimik.
Xak'alutskíinsa'an tumen: Sasil Sánchez Chan
