Tu síistal k’iin le martes 6 ti’ agosto máanika’, je’ets’ sa’at u kuxtal yucatecoil jts’iib Roldán Peniche Barrera. 89 u ja’abil ka’achij.
U jo’olpóopil u noj kajail Jo’e’, Alejandro Ruz Castro, tu ts’áaj k’ajóoltbil jump’éel ts’íib ti’ redes soosyales tu’ux tu yaj óoltaj u kíimilz le nojoch máaka’, máax xan tu beetaj u jk’aay tuukulil, jpéeriodistáa yéetel jka’ansaj.
En español: Fallece el escritor yucateco Roldán Peniche Barrera
“Kin jach yaj óoltik u sa’atal u kuxtal jnoj ts’íib Roldán Peniche Barrera, máax u p’atmaj k’a’anan ba’alo’ob yóok’olal meyaj tu beetaj, tu’ux tu chíikbesaj k’ajla’ay, káan iik’ ti’ilil yéetel u yóol u kaláanta’al maaya miatsil.
In láak’inaj yiknal u láak’o’ob. Utsil je’elek”, tu ts’íibtaj jo’olpóop. Peniche Barrera meyajnaj beey secretario tu kúuchil Fondo Editorial de Yucatán, tu jo’olbesaj u jaats meyajil Literatura ichil u mola’ayil Instituto de Cultura de Yucatán, tu jo’olbesaj Hemeroteca del Estado, tu beetaj xan u secretarioil Academia Yucatanense de Artes y Ciencias yéetel táakpaj ti’ jejeláas medios yaan te’el lu’umila’.
Tu k’iinil 27 ti’ septiembre ti’ u ja’abil 2022e’ tu k’amaj u chíikulal medalla Eligio Ancona ku k’u’ubul tumen Universidad Autónoma de Yucatán. Jts’íibe’ chíimpolta’ab xan yéetel u chíikulal medalla Yucatán tu ja’abil 2011, yéetel uláak’ chíimpolalo’ob tu lu’umil Yucatán yéetel México. Tu ja’abil 2020e’ tu chukaj 50 ja’abo’ob úuchik u yáax ts’a’abal k’ajóoltbil jump’éel u ts’íibil Roldán Peniche, El último sol: meditaciones de la mística maya.
Xak'alutskíinsa'an tumen: Sasil Sánchez Chan
