Xkaanpechil ts’íib Briceida Cuevas Cob tu k’amaj u noj chíimpolalil Medalla Bellas Artes en Lenguas Indígenas ku k’u’ubul tumen u jala’achil u noj lu’umil México.
Ti’ jump’éel k’a’aytajil ts’íib jts’a’ab k’ajóoltbil tumen Secretaría de Cultura ti’ u jala’achil u noj lu’umil México yéetel u mola’ayil Instituto Nacional de Bellas Artes y Literatura (Inbal) tu’ux a’alabe’ máaxo’ob xak’alt u yuumilo’ob ti’al le chíimpolala’, tu jets’aj u k’ubik u medallail 2023 ti’ Cuevas Cob tumen “k’a’anan u meyaj ich káan iik’ ti’ilil ku beeta’al walkila’ tu noj lu’umil México, ts’o’oke’ najmal ti’al u kaláanta’al yéetel u k’a’ayt’a’al t’aan beeyxan maaya miatsil”.
En español: Poeta campechana Briceida Cuevas recibe Medalla Bellas Artes en Lenguas Indígenas
“K‘aay tuukul u beetmaje’ ku ye’esik u ki’ichkelemil u t’aan, yéetel u k’a’ananil u jejeláasil miatsil yaan yóok’ol kaab”, a’alabij. U chíimpolalil Cuevas Cobe’ táaka’an ichil u k’uubajil Medallas Bellas Artes 2023 yéetel 2024 beeta’ab le 5 yéetel 6 ti’ agosto máanika’, tu kúuchil Sala Manuel M. Ponce yaan ichil Palacio de Bellas Artes, tu’ux kóoj máax jo’olbesik Inbal, Lucina Jiménez López.
Ikil u kaxta’al u chíimpolta’al u jejeláasil máasewal t’aanilo’ob México yéetel tumen táaka’an xan ichil Decenio de las Lenguas Indígenas, jets’a’an tumen Organización de las Naciones Unidas para la Educación, la Ciencia y la Cultura (Unesco), jets’a’ab xan ka yanak Medalla Bellas Artes en Lenguas indígenas.
Ichil Comité Dictaminador ti’al u k’u’ubul Medalla Bellas Artes en Lenguas indígenas, táaka’an xmixtecail ts’íib yéetel doctora ti’ u kaambalil lingüística Celerina Sánchez, xzapotecail ts’íib Natalia Toledo, beyxan jnáhuatl ts’íib Mardonio Carballo.
Xak'alutskíinsa'an tumen: Sasil Sánchez Chan
