Ti’ jump’éel p’is k’iinile’, óoli’ mil 500 u túul táanxel lu’umil máako’obe’ ooko’ob Reino Unido ti’ mejen cheemo’ob úuchik u k’átalo’ob tu beelil la Mancha, beey úuchik u ts’a’abal k’ajóoltbil tumen Ministerio del Interior británico.
Xoka’abe’, ti’al u k’iinil 11 ti’ agostoe’ ook 703 u túul táanxel kajil máako’ob te’el beelil ja’o’; tu jo’oloje’, 125; ti’al u k’iinil 14e’, ook 107i’ yéetel tu k’iinil 17e’, ook 492. Le lunes máaniko’, ministerioe’ tu ts’áaj k’ajóoltbil jaytúul máako’ob k’uchij.
Maanal 700 u túul táanxel
kajilo’ob k’ucho’ob jump’éel
k’iin antes te’el Reino Unido,
ts’o’oke’ lelo’ jump’éel reekord
ti’al le jaytúul máak ojéela’an
k’uch chéen ti’ jump’éel k’iin, tu
jo’oloj k’uchuk laboristailo’ob tu
muuk’il jala’ach.
Reekord ojéela’an yanchaj tu xuul kaajilo’ob sáansamal ichil u ja’abil 2024a’, j-je’ets’ le 18 ti’ junio máaniko’, ka’alikil oka’an meyaj Partido Conservador. Te’el k’iino’ kóoj 900 u túul táanxel kaajil máako’ob.
Laboristailo’obe’ tu náajaltajo’ob yéeytambal tu k’iinil 4 ti’ julio. Táanxel kajil máako’obe’ suuka’an u kaxtiko’ob je’el ba’axak súutukil ti’al u k’atiko’ob u beelil la Mancha, tak kéen k’uchuko’ob Reino Unido, tu’ux ku ts’áakubáajo’ob okol yóok’olal u nu’ukbesajilo’ob kaaj yaan, beyxan ti’al u kaxtiko’ob ka ts’a’abak u ju’unil ti’ob beey refujiadóos yéetel ti’al u yantal u yutsil náajal ti’ob.
Maanal 40 mil táanxelx kajil máako’ob tu k’ato’ob tu ja’abil 2022, u beelil la Mancha ti’al u kaxtiko’ob okol te’elo’.
Ichil ba’ax a’alan tumen u kúuchilo’ob k’a’aytik péektsilo’obe’, Jala’ache’ ku xupik 7 miyoonesil libráas esterlinas sáansamal, le je’ela’ óoli’ kex 9 miyoonesil doolarées, ti’al u bo’otik otelo’ob ti’al táanxel kaajil máako’ob.
Xak'alutskíinsa'an tumen: Sasil Sánchez Chan
