U xookil jaytúul ajmeyajo’ob ts’o’ok u kíimilo’ob yóok’olal ba’atelilo’ob ts’o’ok u yantal yóok’ol kaab le ja’ab máaniko’ -maanal u chúumukile’, tu jo’oloj káajak u ba’ateltáambalil Israel yéetel Hamás le 7 ti’ octubre máaniko’- k’uch ti’ le beyka’aj ma’ yáax yanako’, ts’o’oke’ táan u tukulta’ale’ te’el ja’aba’ yaan u maas ya’abtal, a’alab tumen Naciones Unidas le lunes máanika’.
En español: La ONU denuncia violencia ''inadmisible'' contra trabajadores humanitarios
U kúuchil Oficina de Naciones Unidas para la Coordinación de Asuntos Humanitarios (OCHA, yóok’olal bix u k’aaba’ ich inglés t’aane’) tu ya’alaj ti’ jump’éel tsoolmeyaj yóok’olal u k’iinil Día Mundial de la Asistencia Humanitaria, yanchaj 280 u túul ajmeyajo’ob jkíimo’ob ti’ 33 u p’éel noj lu’umo’ob tu ja’abil 2023, maanal ka’atéen ti’ le 118 yanchaj ti’ le ja’ab aanteso’.
U meyajnáalil ONU, Antonio Guterres, tu ts’íibtaj ti’ X, najmal u chíimpolt’al ajmeyajo’ob kíinsa’an te’el ja’ab maas jach táaj k’aas u ti’alo’ob, ts’o’oke’ tak le je’elo’, mix táan u chúukpajal ti’al u nojba’alkúunsalo’ob.
“Sudán yéetel uláak’ ya’abach noj lu’umo’obe’, ku beeta’al k’aas ti’ ajmeyajo’ob, ku kíinsa’alo’ob, ku loobilta’alo’ob wa ku yokolta’alo’ob. K-k’áatik ka yanak u je’ets’el u si’pil máaxo’ob beetik”, tu ya’alaj máax jo’olbesik ONU.
Maanal 280 ajmeyajo’ob ts’o’ok u kíimil tu ba’ateltáambalil Gaza; walkila’ oka’an tu lajunp’éel winal ba’atelil. U ya’abil ti’ le je’elo’obo’ palestinoilo’ob ku meyajo’ob Agencia de Naciones Unidas para los Refugiados de Palestina en Oriente Medio (UNRWA), je’el bix a’alab tumen OCHA.
Xak'alutskíinsa'an tumen: Sasil Sánchez Chan
