Jump’éel ti’ le mola’ayo’ob ma’ ch’éenek u ya’abtal u náajal ichil tuláakal yóok’ol kaabe’, leti’e’ beetik videojuegos yéetel u jeel ba’alo’ob ku k’a’abéetkunsa’al.
Kéen u ya’al u ts’o’okol u ja’abil 2024e’, tukuta’an yaan u náajalta’al 187 mil 700 miyoonesil doolarées, le je’ela’ kex 3 biyoones 754 mil miyoonesil pesos, ts’o’oke’ lelo’ ku ye’esik u ya’abtal kex 2.1 por siento keetel yéetel le ja’ab máaniko’.
Ichil ba’ax a’alab tumen u ts’ook Reporte mundial ti’ mola’ayo’ob meyajtik videojuegos beeta’an tumen Newzoo, u fiirmail Países Bajos meyajtik le ba’alo’ob beyo’, le beyka’aj náajalo’ ku méek’ik tuláakal ba’ax táaka’an ichil le industria je’elo’, le je’ela’ u k’áat u ya’ale’ táaka’an konsooláas, báaxalo’ob, u koonolil kóontroles, óofisial ba’alo’ob, u pasesil u báaxta’al ti’ Internet, ichil uláak’ ba’alo’ob.
México túune’ ma’ jumpáay yaniki’, tumen jump’éel ti’ le noj lu’umo’ob tu’ux maas tun ya’abtal máaxo’ob ku báaxal, tumen tak le ja’ab máaniko’ tu beetaj u yantal kex 39 mil 99 miyoonesil pesos, ts’o’oke’ lelo’ tu beetaj u ya’abtal 3.9 por ciento keetel yéetel u ja’abil 2022, ba’ale’ tuláakal ba’ax a’alike’ te’el ja’aba’ láayli’ beey kun úuchulo’, je’el bix jets’a’abik tumen The Competitive Intelligence Unit (The CIU).
Ichil ba’ax ts’o’ok u ya’alal tumen Newzooe’, ti’ le ts’ook 11 ja’abo’obe’, tu ja’abil 2022 p’íitchaj náajal ti’ videojuegos, ba’ale’ ti’al 2023e’, ka’anchaj 0.6 por siento. Ti’l 2027e’, ku tukultike’ yaan u náajalta’al kex 213 mil 300 miyoonesil doolarées.
Xak'alutskíinsa'an tumen: Sasil Sánchez Chan
