Xmexikoil ts’íib Ruperta Bautista Vázquez yaan u k’amik u chíimpolalil Premio de Literaturas Indígenas de América 2024 (PLIA), tu cha’anil Feria Internacional del Libro de Guadalajara (FIL) úuchik u ts’íibtik Poemario Lóbrego tu’ux ku ch’a’achibtik kíimil ku yúuchul ichil u ko’olelil máasewal kaajo’ob.
U k’a’aytajil juradoe’, Angélica Ortiz López, tu tsikbaltaj le martes máanika’ ti’ k’a’aytajil tsikbale’, meyaj ts’íibta’ab ich tzotzil t’aan ‘Ik´al labtavanej’, jump’éel “meyaj kaláanta’an, tu’ux ku chíikbesa’al bix u na’ata’al kíimil, ts’o’oke’ ku ye’esik u na’at u kaajal tu táan kuxtal chíika’an yéetel le ma’ chíika’ano’, tu táan wíinik yéetel le ma’atecho’”.
En español: La poeta tzotzil Ruperta Bautista gana el Premio de Literatura Indígena de la FIL
Máaxo’ob xak’alt meyajo’obe’ tu tukultajo’obe’, k’aay tuukulo’obe’ ku chíikbesiko’ob u miatsil le kaajo’ ts’o’oke’ ku “k’a’abéetkunsik jats’uts ts’íibo’ob nuupul yéetel yuumtsilo’ob, kili’ich wiits’o’ob, meyaj wíinik nuupul yéetel u meyal kool beyxan chuuy, je’el bix xan u yóok’otil kuxtal yéetel kíimil”. Bautista Vázquez, 49 u ja’abil walkila’. U kaajale’ San Cristóbal de las Casas, Chiapas.
Ku meyaj beey sutt’aan, ts’o’oke’ yaan kamp’éel áanalte’ob u beetmaj yóok’lal tsikbalo’ob, noj tuukulo’ob yéetel balts’am; jayp’éel ti’ u meyajo’obe’ suta’an ich inglés, francés, italiano, catalán yéetel portugués t’aan. T
u ja’abil 2001 tu k’amaj Premio de Poesía Indígena Pat O’tan yéetel Medalla Benito Juárez, tu ja’abil 2012. U meyaje’ chíikpaj ichil u jeel 47 k’ama’ab, ich bolonp’éel máasewal t’aano’ob ku yu’uba’al Argentina, Bolivia, Ecuador, Perú, Colombia, Guatemala yéetel México. Ti’ le je’elo’obo’ 17 u ti’al ko’olel yéetel 30e’ ti’al xiib.
Xak'alutskíinsa'an tumen: Sasil Sánchez Chan
