Tu jo’oloj jump’éel winal káajal noj oliimpikóo k’iimbesaj tu noj kaajil Paríse’, chúun xan le miércoles máanika’, u súutukil e’esik tán u káajal keetil Paralímpicos 2024, tu’ux ku kaxta’al u tóoch’ta’al “tuláakal wíinkilalo’ob yaan”.
Tu yáam k’iim ku lelemánkil te’el parisinoil kaajo’, beeta’ab jats’uts cha’an xáanchaj kex óoxp’éel ooráas, patjo’olta’ab tumen j-jo’olbesaj balts’am Thomas Jolly.
En español: Ceremonia de apertura de los Paralímpicos, último capítulo de un verano deportivo en París
Chan ba’ax yéeya’ab ti’al u beetik u aalak’il París 2024’, Phryge u k’aaba’, ts’o’oke’ leti’ chíikpaj tu yáax súutukilo’ob cha’an. Le je’elo’ káaj yéetel jump’éel u cha’anil jparanadador francesil Théo Curin, ka’alikil na’aka’an ti’ jump’éel kisbuuts’ chuup yéetel u peluchesil le chan aalak’o’.
Yanchaj kex 4 mil 400 u túul déeportistas ti’ kex 168 u p’éel noj lu’umo’ob; káaj u xíimbalo’ob Campos Elíseos, tukulta’an beey jump’éel ti’ “u asab ki’ichkelemil noj bejo’ob yaan ichil tuláakal yóok’ol kaab”, ka’aj k’ucho’ob Plaza de la Concordia, tu’ux ets’ekbal noj escenario tu bak’pachil Obelisco de Luxor, tu’ux e’esa’ab u cha’anil Paradoxe (Paradoja).
Te’elo’, leti’e’ tu’ux xo’ot u kaal Luis XVI yéetel María Antonieta ka’alikil táan u ba’ateltáambalil Revolución, Jollye’ tu k’a’aytaj cha’an tu’ux chíimpolta’ab “tuláakal wíinkilalo’ob”.
U noj lu’umil Méxicoe’ táan u chíikbesikubáaj yéetel 67 u túul máako’ob ku kaxtik u náajaltiko’ob kex jump’éel medayáa. Máax jo’olbesik Comité Oorganizador de los Juegos, Toyn Estanguet, tu ya’alaje’ ts’o’ok u ko’onol kex 2 miyoonesil boletóos ti’al u cha’antal keetilo’ob yaan u ts’o’okol tak tu k’iinil 8 ti’ septiembre.
Xak'alutskíinsa'an tumen: Sasil Sánchez Chan
