Tu bosiinasil le kúuchilo’, jump’éel chaambel t’aane’ ku k’áatik ti’ máaxo’ob ku cha’ane’ ka much láaj p’áatak ich ch’eench’enkil, ts’o’okole’, ku juum k’a’am xóob. Ku k’uchul u súutuke’, tak u jach p’el juumil ku yantale’, ku yéets’ta’al ichil Estadio de la Torre Eiffel.
Chochobkil u cha’anta’al ba’ale’ yaan súutuko’obe’ talam u yila’al wa ti’ yano’obi’. Le je’ela’ jump’éel ba’al ma’ táan u jáan tukulta’al wa je’el u béeytal tu ya’abil le kúuchilo’ob tu’ux ku beeta’al le keetilo’obo’. Je’el bix tu báaxalil futboole’, u seen juum ba’ale’ ku beetik u máakal u xikin máak. Ba’ale’ lela’ ma’ chéen je’el máakalmáak fuutboli’.
Báaxal tu’ux yaan máako’ob ma’ sáasil u yicho’obi’, le beetik le je’ela’, jump’éel ti’ u ka’ap’éel keetilo’ob ich paralímpicos París 2024 tu’ux xmuukule’, jach táaj k’a’anan.
U báaxalil futbool ti’al máax mina’an u sáasile’ yéetel goldole’ ku báaxta’al tumen máako’ob mina’an u sáasil u yicho’ob. Kéen p’áatak mina’an jump’éel ti’ le jo’op’éel sentidoso’, u jeelo’obe’ ku kaxtiko’ob bix u yáantik u yóol wíinik.
Wa mina’an sáasil tu yich máake’, u’uyaje’ ku táanilchajal. Ichil u ka’ap’éelil le keetilo’obo’, ku ts’a’abal ti’ le balono’ jump’éel xchikil wa k’olom ti’al u yu’ubal naats’ yanik tumen máaxo’ob ku báaxal. Ajbáaxalo’obe’ ku paklan awato’ob ka’alikil u yáalkabiko’ob le tu’ux ku báaxalo’obo’, ts’o’oke’ máax ku cha’ane’ k’a’abéet u makik u chi’ tak kéen ts’o’okok le báaxalo’.
Xak'alutskíinsa'an tumen: Sasil Sánchez Chan
