U xookil máaxo’ob kíimil yóok’olal u chak ik’alil Yagi, tumen jaats’naj tu noojolil Vietnam, jnáak 127 u túulal, beey úuchik u ts’a’abal k’ajóoltbil le martes máanika’ tumen kúuchilo’ob k’a’aytik péektsilo’ob te’elo’, tu’ux xan a’alabe’ yaan 54 máak saatal.
U kúuchil Agencia Vietnamita de Información (VNA) tu ch’a’achibtaj ba’ax a’alab tumen u meyajnáalilo’ob kool ti’al u jets’iko’obe’ jach beey ucha’ano’.
Óoli’ kex 210 mil eektareasil koole’ jach k’aschajij, ts’o’oke’ kíim xan kex 734 mil wakaxo’ob yéetel xkaaxo’ob ku yaalak’ta’al, je’el bix a’alabik tumen VNA.
Beyxan tu noj lu’umil China yéetel Filipinase’ xoka’ab xan kex 82 kimeno’ob yéetel 64 máak saatal.
Búulkabil yéetel luuk’ áalkabnaj yóok’olal le k’a’amkach cháako’ tu loobiltaj kex 752 máako’ob, a’alab tumen máaxo’ob xak’altik desastres naturales.
Aj-áantaj máako’obe’ tu xachubáaj u yáanto’ob máaxo’ob p’aatalo’ob yóok’ol u najo’ob úuchik u láaj búulul kaaj tumen Yagi.
Chak ik’ale’ kóoj te’elo’ tu ja’atskab k’iinil le sábado máanika’, tu baantail Haiphong, ts’o’oke’ jats’a’ab beey u asab k’a’amil jaats’naja’an tu xamanil Vietnam ichil u ts’ook óoxp’éel lajun ja’abo’ob. u k’a’amil u jaats’e’ k’uch tak 149 km/h.
Xak'alutskíinsa'an tumen: Sasil Sánchez Chan
