Kaye’ k’ajóolta’an ich káastelan t’aan beey pez león (Pterois volitans). Juntúul ba’alche’ ku multun ba’ale’ te’el yáax ja’ab k’uch tu ja’ilo’ob Caribe Mexicano óol talamchaj ba’al tumen. Jujump’íitile’ ajchuk kayo’obe’ ts’o’ok u bin u p’atiko’ob u p’iisil u yantal, ikil u chu’ukul ti’al u jaanta’al, beey tu ya’alaj Juan Jacobo Schmitter-Soto, jxak’al xook jo’olbesik u kúuchil Departamento de Sistemática y Ecología Acuática tu noj najil xook El Colegio de la Frontera Sur.
Tu tsikbaltaj kaye’ yanchaj tu k’áak’nabilo’ob índico yéetel Pacífico, ts’o’oke’ jach ya’ab u yantalo’ob tu baantail Filipinas yéetel Indonesia, yéetel uláak’ u jejeláasilo’obe’ Mar Rojo. Le ku jach yantal tu ja’ilo’ob Caribe leti’e’ Pterois volitans, ba’ale’ ku k’uchul xan u jejeláasil Pterois miles, ba’ale’ jach ma’ ya’abtaki’
En español: Pez león, especie invasora que ha logrado controlarse
Pterois volitanse’ táakbesa’an ich Lista Roja jóok’sa’an tumen Unión Internacional para la Conservación de la Naturaleza (UICN) beey Least Concern, u k’áat u ya’ale’ ma’ jach chi’ichnak yanik u ch’éejeli’. Le kaya’ ku jaanta’al ts’o’oke’ ki’. Ku ko’onol ti’ kúuchilo’ob janal Quintana Roo, u ya’abile’ Xcalak yéetel Cozumel.
Ku jaantik óoli’ je’el ba’axak kaye’ wa je’el ba’axak ka okok tu chi’. Chíika’an leti’ tumen yaan u sak, chak-boox, yéetel chak t’o’olil u wíinkilal. Ma’alob u yila’al ti’al u jats’utskúnsa’al acuarios. Ku p’isik ichil 30 tak 40 cms kéen nojochchajak, ka’alikil tu táankelemile’ ma’ tu chukik 2 cms.
Xak'alutskíinsa'an tumen: Sasil Sánchez Chan
