U meyajnáalil Organización de las Naciones Unidas (ONU), Antonio Guterres, tu jets’aj le martes máanika’, ka’alikil chúunsa’ab u k’iinilo’ob Alto Nivel de Naciones Unidas, “le bix yanik yóok’ol kaabe’ ma’ táan u béeytal u kuxtal beyo’”, ts’o’oke’ “ma’ tu béeytal u p’áatal ba’al beyo’”.
En español: El mundo tal como está es ''insostenible, no podemos seguir así'': secretario general de la ONU
Guterrese’ tu ch’a’achibtaj le óoxp’éel ba’alo’ob maas jach k’aas u lúubul ti’ yóok’ol kaab: u yúuchul tuusil meyaj, tumen chíika’an ti’ tuláakal nojoch talamilo’ob yaan walkila’ -je’ex Gaza, Líbano, Ucrania wa Sudán; xma’ keetil kuxtal, tumen ku maas talamkúunsik ba’al ichil le noj lu’umo’obo’; yéetel chi’ichnakil ku yantal ikil u k’éexel u chokolil yóok’ol kaab, beyxan tumen mina’an u p’iis u k’a’abéetkunsa’al inteligencia artificial (IA).
Je’ex suukil u beeta’al te’el múuch’tambalo’, meyajnáale’ tu ch’a’achibtaj le noj talamilo’ob yaan yóok’ol kaab, je’ex le ku jóok’olo’ob ti’ ba’ateltáambal yéetel u ja’ajatspajal noj lu’umo’ob yóok’olal bix u kaajil, túumben nu’ukulo’ob, yéetel kex tumen “yaan ba’alo’ob táan aktáanta’ale’ ma’ u k’áat u ya’al wa mina’an uts ba’al ti’al beetbili’”, ba’ax tu ya’ale’ ma’ jach sáasili’.
Xak'alutskíinsa'an tumen: Sasil Sánchez Chan
