José Orlando Regalado Alonso k’ajóolta’an ka’ach tu kanti’itsil ba’atel beey Rey Destroyer. Ka’alikil tu ketikubáaj ka’ach tu táan Black Spider Jr, ñe 2 ti’ marzo máanika’, tu péetlu’umil Monterrey, jkíim úuchik u lúubul tumen úuch loob tu ts’o’omel u pool. 22 u ja’abil ka’achij. Ichil le lajunp’éel k’iino’ob oksa’an te’el kúuchil ts’akyajo’, ajba’atelo’ob je’el bix LA Park, Silver Star yéetel Latin Lovere’ tu much’ajo’ob taak’in ti’al u yáantiko’ob u baatsil, tumen yaan talamo’ob ka’ach ti’al u béeytal u bo’ota’al kúuchil tu’ux oksa’an.
Ichil ba’ax yaan u yil yéetel Rey Destroyer ila’ab bix u biinsmaj u kuxtal ka’alikil oka’an jimaasyóos. Yaane’ kex yaj u píixe’ ti’ yani’, ts’o’oke’ lelo’ chéen ba’alo’ob taalja’an tu paach ba’atel ku beeta’al. Ma’ ya’ab máak ku kanik kuxtal yéetel lo’olo’oxi’. Ya’abo’one’ k-a’alik uts t-ich wa jkíimo’on ti’ jump’éel ring, ba’ale’ u jaajile’ saajko’on ma’ ksuut tak taanaji’, ku ya’alik Lino Fernando Aguilera, Fresero Jr, máax péeknaj ti’ buus kex náach tu’ux ku bin yéetel kex ma’ jeets’el wa yaan tu’ux u ba’ateli’.
Ajba’atel máako’obe’ ku yantal u bo’otiko’ob ba’al u ti’alo’ob, beyxan u xuupil u entrenaro’ob. Tu yáam piix iche’ ku chíikpajal ajkoonolo’ob, ajmen waajo’ob, u ajka’ansajilo’ob educación física, áabogado’ob, yéetel uláak’ máako’ob ku p’atik ba’al u beeto’ob ti’al u náachtalo’ob, tumen chéen ja’alil beey je’el u k’ajóoltalo’obe’.
U lisensiao’obe’ jump’éel legal ju’un ku k’áata’al ti’al u táakpajalo’ob ti’ lucha. U páayt’aanile’ ku ka’atéen u jóok’ol ichil jump’éel ja’ab yéetel ku ts’o’oksa’al kex tumen 50 ajba’atelo’ob. U meyajo’ob xma’ ju’unile’ ma’ jets’ik wa máax ku ba’atele’ no’oja’an yanik ti’al u ketikubáaj, ts’o’oke’ maas sajbe’entsil u yúuchul wa ba’ax k’aas ti’obi’.
Xak'alutskíinsa'an tumen: Sasil Sánchez Chan
