U noj lu’umil Israele’ tu jets’aj le miércoles máanika’ “non grata wíinik” Antonio Guterres, máax beetik u séekretaryóo jeneraalil ONU, tumen ma’ “jumpuul úuchik u jets’ik” loobilaj tu beetaaj Irán yóok’ol israelíil lu’um.
“Je’el máaxak ma’ táan u tsa’ayal u jets’ik jumpuul le k’aak’as ba’al tu beetaj Irán yóok’ol Israele’ ma’ unaj u pe’echak’tik israelíil lu’um. Meyajnáale’ ma’ táan u táakmuk’tik Israel, ts’o’oke’ ku tóoch’tik téeroristaob, byóoladoro’ob yéetel kiinsaj máako’ob”, a’alab ti’ k’a’aytajil ts’íib tumen káansiyeer Israel Katz.
En español: Israel declara ''persona non grata'' a Antonio Guterres, secretario general de la ONU
Iráne’ tu ts’o’ots’onaj Israel yéetel kex 200 u p’éel misiles tu yáak’abil le martes máanika’. Le beetik Guterrese’ t’aanaj yóok’olal “bix náachchaj ba’atel yaan Medio Oriente”, yéetel le bix u beeta’al le k’aaba’inta’an beey “escalada tras escalada”.
“Le ba’ala’ k’a’abéet u ts’o’okol. K’a’abéet kxu’ulsik k’áak’ joopol”, tu ya’alaj Guterres.
Máax jo’olbesik ONUe’ ts’o’ok u k’áatik mantats’ ka xu’uluk u seen wa’awak’a’al ba’al tumen Israel ka’alikil táan xan u ti’al Hamas, tu lu’umil Gaza, yóok’ol Hezbollah tu lu’umil Líbano.
Xak'alutskíinsa'an tumen: Sasil Sánchez Chan
