U Nobelil Paze’ k’a’ayta’ab le viernes máaniko’, u ti’al jump’éel japonesil múuch’kabil ku k’aaba’tik Nihon Hidankyo, tu’ux ku múuch’o’ol máaxo’ob béyechaj u jechik u wa’awak’ajil Hiroshima yéetel Nagasaki tu ja’abil 1945, “yóok’olal ba’ax tu beetajo’ob ti’al ma’ u yantal nuklear ts’oono’ob te’el yóok’ol kaaba’”.
Múuch’kabile’, káajsa’ab tu ja’abil 1856. Chíimpolta’ab tumen “tu ye’esaj yéetel u muuk’il u t’aane’, nuklear ts’oono’obe’ ma’ unaj u ka’ k’a’abéetkunsa’al mix bik’ini’”, a’alab tumen máax jo’olbesik noruegoil Comité Nobel, Jørgen Watne Frydnes.
En español: Nobel de la Paz, a organización japonesa antiarmas Nihon Hidankyo
Máax beetik u copresidenteil Nihon Hidankyo, Toshiyuki Mimaki, ja’ak’ u yóol ka tu yilaj chíimpolta’ab múuch’kabil tu’ux yaan. “Mix juntéen tin náaytaj wa je’el u yúuchul le je’ela’”, tu ya’alaj ti’ k’a’aytajil tsikbal beeta’ab tu kaajil Tokio.
Máax jo’olbesik Comité Nobele’ tu ya’alaj “jak’be’en óol” tumen “u je’ets’el ma’ u k’a’abéetkunsa’al nuklear ts’oono’ob” úuchik u seen wa’awak’a’al ba’al tu winalil agosto tu ja’abil 1945e’, walkila’ “táan presionarta’al”.
“Chíimpolta’al te’el ja’aba’ ku kaxtik u mu’uk’ankúunsik veto nuklear jets’a’abij. Tuláakalo’on k’a’abéet kmeyaj u ti’al, u ya’abile’ máaxo’ob mu’uk’a’an nuklear ba’al u ti’al”, tu ya’alaj Frydnes.
Xak'alutskíinsa'an tumen: Sasil Sánchez Chan
