Máako’ob yéetel u ts’oono’obe’ tu kíinsajo’ob jk’iin Marcelo Pérez Pérez, máax p’aata’al ka’ach tu teemploil Guadalupe, ti’ le noj kaajo’, beey úuchik u ts’a’abal k’ajóoltbil tumen u máakilo’ob u dióseesil San Cristóbal de Las Casas.
A’alab tsotsil jk’iine’, síij tu méek’tankaajil San Andrés Larráinzar, tu Altosil Chiapas, ba’ale’ loobilta’ab tu múuch’kajtalil Cuxtitali, tu lak’inil San Cristóbal.
En español: Asesinan al sacerdote Marcelo Pérez en San Cristóbal de Las Casas, Chiapas
Kajnáalo’ob te’elo’ tu tsikbaltajo’obe’ Pérez Péreze’ luk’ ka’ach tu teemploil Cuxtitali ka’aj ts’o’ok u ya’alik misa, ba’ale’ ts’ona’ab ka’alikil ti’ yaan yóok’ol u kamyóonetae’.
Fiscalía General del Estado (FGE), ikil u ts’áamaj meyaj xan Fiscalía de Asuntos Especiales y Distrito Altos, tu ts’áaj k’ajóoltbile’ ts’o’ok u káajal u xak’altik ba’ax úuchij je’el bix jets’a’anile’, ti’al u yojéelta’al máax wa máaxo’ob kíins Marcelo ‘N”.
Tu ya’alaje’, tu jo’oloj ojéelta’ak ba’ax úuche’, u máakilo’ob Policía de Investigación táakano’ob meyaj Fiscalía Distrito Altos yéetel u máakilo’ob Servicios Periciales bino’ob tu bejil Las Peras, tu ti’itsil u bejil Flanz Bloom barrio Cuxtitali, tu’ux a’alabe’ yaan ts’o’ots’onajil te’elo’.
Xak'alutskíinsa'an tumen: Sasil Sánchez Chan
