Merry MacMasters, máax ku meyaj beey reportera ti’ La Jornadae’, yaan u chíimpolta’al yéetel Homenaje Nacional de Periodismo Cultural Fernando Benítez ka’alikil táan Feria Internacional del Libro (FIL) tu péetlu’umil Guadalajara, le 8 ti’ diciembre ku taala’, “yóok’olal meyaj u beetmaj tu jo’oloj ka’ak’áal ja’abo’ob, tu’ux ku ts’íib yóok’olal miatsil yéetel its’at, kroonikáa, reportaajée yéetel tumen mantats’ u kaxtik yéetel u ye’esik ba’alo’ob yóok’olal aartes plaastikáas”.
Jump’éel komite tu’ux táakpaj jo’otúul máaxo’ob ts’o’ok u yáax chíimpolta’alo’ob jets’ Merry MacMaster; a’alabe’ “yaan ba’alo’ob mantats’ u yila’al ti’ u meyajil periodismo kulturaal le beetik mantats’ u k’éexel u fueenteil wa u ch’éenel u beeta’al; ba’ale’ Merrye’ jach kúulpach yanik ti’ le ba’al je’ela’”.
Chíimpolale’ ts’o’ok u yáax k’a’amal tumen Braulio Peralta, Adriana Malvido, Jesús Alejo y Héctor Aguilar Camín.
Merry MacMasterse’, síij tu kaajil Nueva York, ts’o’oke’ k’a’anan ti’al u meyajil periodismo cultural ku beeta’al tu lu’umil México, yéetel meyajnaja’an ti’ jejeláas medios, tu’ux ts’o’ok u k’áatchi’ibtik mexikoil máako’ob, beyxan u jeelo’ob ti’ uláak’ táanxel lu’umo’ob. Káaj u meyaj tu ja’abil 1980 beey u reporterail Radio UNAM, yéetel ka’aj ts’o’oke’ ook meyaj tu pikil ju’unil El Nacional, tu’ux p’áat tak tuja’abil 1994; láayli’ u ja’abil úuchik u yokol meyaj La Jornada, tu’ux p’aatal tak walkila’.
Xak'alutskíinsa'an tumen: Sasil Sánchez Chan
