Fernando Valenzuela, máax síij México yéetel báaxalnaj tu múuch’il Dodgers, ti’ u noj lu’umil Los Ángeles, jkíim le martes máanika’. 63 u ja’abil ka’achij. Tu yóok’olale’ yanchaj “Fernandomanía” ka’alikil u náajaltik u chíimpolalil Cy Young ts’a’aban tumen Liga Nacional, beyxan Novato del Año yéetel Serie Mundial tu ja’abil 1981.
Múuch’báaxal tu ya’alaj Valenzuelae’, máax k’ajóolta’an beey u jach táaj no’ojan beisbolitail tu noj lu’umil Méxicoe’, kíim ti’ jump’éel u kúuchil ts’akyaj ti’ u kaajil Loa Ángeles ba’ale’ Los Dodgerse’ ma’ tu ya’alaj ba’ax yóok’olali’.
En español: Fernando Valenzuela, legendario lanzador mexicano de los Dodgers, muere a los 63 años
Kíimile’ úuch ka’alikil angelinoil múuch’ báaxale’ táan u líik’sikubáaj ti’al u chúunsik Serie Mundial tu yáak’abil le viernes ku taala’, tu’ux kun k’ambil Yanquis ti’ u kaajil Nueva York, múuch’ báaxal pe’ernaj tu táan Dodgers yéetel Valenzuela tu ja’abil 1981.
Valenzuelae’ ku meyaj ka’ach beey kóomentarista ich káastelan t’aan ti’ u múuch’ báaxalil Dodgers, ba’ale’ yanchaj u p’atik tu winalil septiembre ts’o’oke’ ma’ a’alab ba’axteni’. Chéen a’alabe’ yanchaj u yoksa’al tu kúuchil ts’akyaj.
Ichil Liga Mexicanae’ yáax báaxalnaj Leones de Yucatán tu ja’abil 1979, tu’ux chíimpolta’ab beey Novato del Año tu jo’oloj u béeykuns 10-12 yéetel u éefektividadil 2.49 ti’ 26 u téenal u chúunul báaxal; tu ts’o’oksaj 12 u p’éel báaxalo’ob yéetel tu béeykunsaj ka’ap’éel blankeadáas. Ti’ 181 éentradase’ tu béeykunsaj 70 bases por bolas, ts’o’oke’ 141 u téenal tu ponchartaj le máaxo’ob yéetel le ku ketikubáaj te’el súutuko’.
Xak'alutskíinsa'an tumen: Sasil Sánchez Chan
