Kex wakaxtúul máak jkíim yéetel uláak’ kex 25 úuch loob ti’ob le domingo máanika’, úuchik u wa’ak’al ba’al tumen Israel naats’ ti’ u noj kaajil Sidón, tu noojolil Líbano, beey k’a’aytabik tumen libanésil Ministerio de Salud.
Ya’ab máax kaja’an te’el tu’ux beeta’ab loobilaj, ts’o’oke’ yaan baatsilo’ob k’ucho’ob te’elo’ úuchik u yantal u luk’ulo’ob ti’ uláak’ baantailo’ob yaan tu noojolil le noj lu’umo’.
Le je’ela’, leit’e’ yáax wa’awak’ajil yanchaj te’elo’ desde ka’aj káaj ba’ateltáambal ichil Israel yéetel ismlamista libanésil Hezbolá péeksajil le winalil máaniko’.
Loobilaj beeta’ab tumen Israel tu noj kaajil Haret Saida tu kíinsaj waxaktúul máak […]”, tu ya’alaj Ministerio de Salud.
Beyxan ANI, libanesil kúuchil k’a’aytik péektsilo’ob, tu ya’alaje’ ichil le jkíimo’obo’ yaan juntúul chan paal.
Juntúul máax ku meyaj AFP tu ya’alaje’, wa’awak’aje’ beeta’ab ti’ jump’éel óoxt’o’ol kúuchil, ts’o’oke’ jach k’aschaj u yóox t’o’olilo’.
Jayp’éel ti’ le kúuchilo’ob naats’ yaniko’obo’, k’askúuntabo’ob xan, ts’o’oke’ yaan xan paramedikóos ila’ab k’uch te’el tu’ux úucho’, ti’al u kaxta’al wa yaan máax láayli’ kuxa’ane’
Israelíil ajk’atune’ tu k’áataj ka yanka u jóok’sa’al máak yaan tu noojolil Líbano le domingo máanika’, ba’ale’ ma’ tukulta’an wa je’el u k’uchul ba’al tak Haret Saidae’.
Xak'alutskíinsa'an tumen: Sasil Sánchez Chan
